Ora un hoben cay bou di Stichting Reclassering en Jeugdbescherming Aruba, por wak un cambio grandi segun Seraida Leonard.
E ta sigui splica cu tin hobennan basta positivo. Sinembargo tin 15 pa 20 porciento di hoben cu ta duna problema. Probablemente door cu e porcentahe ta hopi abao, no a duna atencion debido na e grupo aki. E caliber di e hobennan ta cambiando y tin cu pone mas atencion na nan. Tin hopi problema social cu tin cu pone atencion na dje, pasobra con cu bay bin e hobennan aki ta e futuro y nan ta e producto di e problemanan social cu tin na Aruba. Si no pone atencion na eseynan, ta keda bay den decadencia pa locual ta nos hobennan.
Prioridadnan mester wordo stipula, segun Leonard. E hobennan mester ta un prioridad, ya cu tin cu traha riba nan futuro.
E situacion ta cu tin un problema social basta grandi na Aruba y mester pone atencion, pasobra e hobennan ta bay keda producto di eseynan. Durante hopi aña a keda señala cu Reclassering ta purba di tackle e problematica, pasobra nan ta haya e hobennan ora cu nan a comete e delito caba. Nan trabao ta pa evita cu nan bolbe cay cera. Pa esey mester di personal, mester di e medionan financiero. Hopi biaha ta bisa pa e hoben bay Reclassering y papia cu nan pa nan bay den nan ambiente, no ta suficiente. Pesey cada biaha mester mas tools, mester ta creativo, mester ta innovativo y esey por bisa cu Reclassering ta, pa motibo cu nan ta keda señala e problemanan cu tin y ta busca solucionnan directo, pa tackle e problema directo. Pesey Leonard a tuma e ehempel como Leerwerktraject. Tabata tin hopi drop out cu tin problema cu husticia y pa e motibo ey a bin cu un proyecto asina.
Mester e parti financiero cu a indica. Tambe a indica cu guia ambulante no ta suficiente pa un tipo of grupo di hoben cu ta keda cay cera y mester bin un institucion pa e hobennan aki. No KIA, pasobra e ta un prizon.
Tin cu rehabilita, re socialisa y reintegra e hobennan aki. Pesey castigo so no ta suficiente. Pero guia y reintegracion, resocialisacion ta hopi importante, segun Leonard.