SEPPA a tuma nota di e circulario DRH no. 673/17 cu fecha 22 mei 2017 den cual circulario Gobierno como dunado di trabao ta desconoce “waterpokken” of Bruela como malesa contagioso. Pa henter e discusión aki, tin 3 articulo tanto di LMA como e Arreglo di Vakantie en Vrijstelling van Dienst cu ta importante ya cu nos ta bay mira na unda e falta di reconocemento aki ta afecta e empleado publico.
1.Articulo 51 di LMA:
Den LMA- Articulo 51 (ta regla Vrijstelling v.Dienst) y akiden e ta bisa claramente “Den caso cu un persona, cu ta biba na e mesun percela cu e ambtenaar of a biba eyden por lo menos 14 dia prome, y ta sufri na algun malesa (describi den e articulo) e.o. Pokken of na otro malesa indica den un LB-ham bao cual e stipulacionnan den e “Landsverordening Besmettelijke Ziekte” ta aplicabel, ta prohibi na e ambtenaar forma parti di su lugar di trabao. E ambtenaar ta obliga pa asina cu e tuma nota cu na e percela tin un malesa manera indica, pa mas pronto posible informa su Hoofd v.dienst.
Y den caso cu e e Hoofd v. Dienst tuma nota di e malesa cu por ta un peliger pa e luga di trabao, e por prohibi e ambtenaar pa subi terreno di trabao.
Berdad ta cu e no ta bisa ‘as such’ waterpokken, pero durante añanan a reconoce esaki si ora di duna liber pa motibo di Bruela.
E articulo aki por tin diferente momento cu e ta bira aplicabel, esta den caso di:
1. E ambtenaar ta casa cu otro ambtenaar.
Un ambtenaar ta traha na KPA, su señora ta traha na DTP (tambe ambtenaar) y e señora tin bruela. E casa Polis di acuerdo cu e articulo 51 di LMA tin e obligacion pa informa su Hoofd v. Dienst, peor ainda si e mes ta corriendo risico di wordo contagia.
E ambtenaar na DTP ta meld ziek di acuerdo cu proceduranan y Articulo 31 di Vakantie Vrijstelling van Dienst ta aplicabel paso e ta malo. Pero articulo 51 di LMA tambe ta aplicabel pero pa e ambtenaar na Korps Politie Aruba cu ta casa di e ambtenaar malo.
Pero tambe por tin un situacion na unda cu na e percela unda e ambtenaar ta biba, tambe ta biba un amiga(o), un prima, etc.. Pues, nada di haber cu yui, casa, etc.. Akinan e articulo 51 di LMA ta aplicabel ! Y ta akinan e problema ta sinta cu e circulario nobo aki DRH no. 673/17 cu fecha 22 Mei 2017 ta un kiebro den derecho, ya cu no kier reconoce bruela como algo contagioso.
2.Articulo 26 di Vakantie/Vrijstelling v. Dienst
Ta otro articulo riba cual e ambtenaar por hasi uso di dje den caso cu yuinan, casa, mayornan, suegronan ta malo, y esaki pa 15 dia. Pero akinan, nos ta papia di ‘ernstige ziekte’ y e definicion cu ta wordo usa pa esaki ta cu e persona ta asina malo cu ta teme pa su bida, pa no bisa cu e ta den fase final. Obviamente, nada di haber cu Bruela!
Y hasta akinan si e 15 dia no ta suficiente, por hasi peticion na Minister hasiendo uso di articulo 29 di Vakantie Vrijstelling v.Dienst.
Si sigui e reaccionnan y ta bisa cu e ambtenaar por hasi uso di e articulo aki pa por haya BVVD den caso cu su yui tin bruela, nos mester mustra riba e hecho cu den practica mayoria biaha e ta wordo nenga mirando e definicion di ‘ernstige ziekte”.
Pero akinan tin un otro situación:
E ambtenaar ta tuma nota cu su casa (no ambtenaar) tin bruela. Bruela no ta cay bao di un ernstige ziekte, articulo 26 di Vakantie Vrijstelling van Dienst no ta aplicabel pero articulo 51 di LMA si ta bira aplicabel ya cu Bruela ta contagioso y e articulo 51 di LMA mes ta obliga e ambtenaar pa informa su Hoofd v. Dienst.
3. Articulo 31 di Vakantie Vrijstelling v. dienst
Malo ta malo, berdad y ora un ambtenaar ta malo e ta haya “Vrijstelling van dienst”, den palabra crioyo nos ta bisa tambe e ta a.o. ¡!. E ambtenaar tin cu actua di acuerdo cu reglanan di ziektemelding y e articulo aki ta bira aplicabel. Akinan Bruela of no, no tin nada di haber y berdad manera cu e Minister Bermudez mes ta declara, no tin necesidad pa hasi uso di e arreglo di Buitengewoon Vrijstelling van Dienst (BVVD).
Y esaki NO ta e discusion ¡!!!
Claramente, tin un confusion enorme den e asunto aki of ta purba di desvia e berdad door di bruha e articulonan aki den otro.
Tur hende por keda contagia cu e virus:
E virus di bruela ta den aire, ta surgi di cualquier momento y/o encuentro.
Pues cualquier encuentro cu un persona infecta por afecta un persona. Kiermen no ta solamente na cas of for di un persona cercano por haya e virus aki.
Ta bon conoci akinan e problema cu ta surgi den cas di e ciudadanonan aki na Aruba desde e momento cu ta conoci cu un of otro familiar tin e malesa di bruela. E ta un malesa cu tin su fase y den cierto momento e ta pega ¡!!
Na cas, yuinan ta haya bruela ta transmiti esaki na otro rumannan, mayornan, tur esunnan cu ta yega cerca y cu sigur no a yega di haya e malesa aki. Y ora papia di no a haya e malesa aki, e por toca e momento ey un persona adulto, un persona edad mediano pero tambe di edad halto. Igual e ta toca muchanan.
E adulto ta bolbe cana cu e virus den su lugar di trabao pero tambe por nifica cu e adulto ta na cas y mester di ayudo. Akinan ta bon cla cu e por trece problema social tambe.
E problema na scolnan.
E problema di bruela ta bolbe surgi na scolnan. E mesun mucha ey ta cana cu su virus ta bolbe pega otro mucha. Un klas, full un scol, tanto muchanan como educadonan por wordo infecta.
Pero e problema aki tambe ta sigui su caminda, na luganan na unda e mayor tampoco tin lugar pa e keda (ta kende kier carga e responsabilidad aki!). P.e. un Traimerdia, di cual ta bon conoci e cantidad di ocasionnan cu ta hopi mucho a pega otro, leidster ta pega leidster.
Tambe mester corda cu tin Leidster na p.e. Traimerdia cu tambe ta mama, y a jega di presenta situacionnan cu e trahado aki no tin hende pa yud’e na cas cu su propio yui cu tin bruela, of e yui tambe ta registra na Traimerdia.
Akinan, e circulo ta sigi !
E discriminación contra e hende muhe!
Cu e circulario aki, un biaha mas ta keda demostra cu Gobierno como dunado di trabao a bay solamente ta wak kiko un tempo a wordo pensa of skirbi. Esaki sin wak e situacionnan cu e ser hende y den mayoria caso e hende muhe ta pasa aden.
Pakiko nos ta referi na e tema di hende muhe, pa e simpel hecho cu historicamente of tradicionalmente ta e hende muher ta asumi e responsabilidad di e yuinan, di mayornan, di cas. E discriminacion aki nunca a bira menos y den escaso hogar, e responsabilidad aki ta comparti.
Ta e hende muhe ey cu mester a subi mercado laboral pa yuda sostene e hogar financieramente ta hay’e confronta cu e hecho di no tin hende pa cuida su yuinan.
E dobbel peso aki no ta cuadra cu e pensamento di gobierno, esta “empoderamiento’ di e hende muhe.
“Waterpokken’ of bruela semper a wordo reconoci como malesa contagioso.
Apesar cu den e definicion no ta papia di “waterpokken”, semper gobierno di Aruba a reconoce bruela na momento di aplica e articulo aki. E base di esaki tabata cu como bon dunado di trabao, gobierno ta responsabel tambe pa salud y bienestar di su empleadonan, un ‘epidemia’ na lugar di trabao no ta deseabel pero tambe ta mira e tema aki mas amplio cu un simpel relación di dunador di trabao y trahado.
Y no aceptando Bruela como un malesa contagioso, claramente no ta tanto pa e malesa, pero haciendo esaki ta kita e derecho di e ambtenaar riba BVVD.
Directiva SEPPA
Aruba, 2 Juni 2017