E referendum ta un di e dosnan cu ta tumando luga na Parke Arikok. Lo tin un mas cu FTA a pidi. Esaki ta un referendum cu e dunado di trabao, den e caso aki Directiva di Parke Arikok. Sr. Anselmo Pontilius, mediador di gobierno ta amplia.
VOTACION
Esaki no sa pasa hopi biaha. Normalmente sindicato of sindicatonan ta pidi referendum. Den e caso aki, Parke a pidi esaki door cu tin dos sindicato paden, y nan kier a determina cual tin e mayoria absoluto, ya cu nan kier yega na e prome contrato colectivo. Den e caso aki, dunado di trabao a pidi esaki, pa cual a convoca esaki. Tanto SEPPA como TOPA a mustra ariba papel cu nan por participa na e referendum, cual a tuma luga. Total di 45 trahado por a haci uzo di nan derecho di voto, di cual 42 a bin vota, 30 a vota pa SEPPA, 11 a vota pa TOPA y uno a vota pa niun sindicato. Esaki tambe ta conduci cu SEPPA tin e derecho di negocia e prome contrato colectivo.
PROBLEMA
Pa e trahadonan, nan kier determina tameb nan condicion di trabao mediante un contrato colectivo y pa hopi tempo na Parke tabata tin e discusion ariba e posicion huridico di variod di e trahadonan. Aworaki ta basta cla pa e trahadonan, con nan posicion huridico ta. Pero mediante un contrato colectivo nan lo por percura con pa mehora e crecemento den cada funcion di cada un di e trahadonan.
A pesar cu e ta algo inusual, pa ley e dunado di trabao por pidi un referendum. Y si tin argumentonan valido, pa ley nan por pidi’e, mescos cu e sindicato (nan). Y si e puntonan ta hopi cla ariba mesa, lo convoca referendum manera cualkier otro.
E dunado di trabao a bisa di kier a negocia cu e sindicato mayoritario y e ley di referendum tambe ta stipula cu e dunado di trabao tin e obligacion pa negocia cu e sindicato cu tin e mayoria di e trahadonan.
Pa loke ta TOPA, a pesar di cu e tin miembrecia, e dunado di trabao no tin obligacion di sinta cu TOPA. Si e miembronan di TOPA no ta di acuerdo cu loke ta wordo negocia, hasta si ora cu nan no ta di acuerdo cu loke a wordo negocia, nan tambe ta forma parti di esaki. Y e desacuerdo, tur partido lo tin cu biba cun’e, segun Sr. Anselmo Pontilius, mediador di gobierno, ariba e referendum na Parke Nacional Arikok.