Den un mensahe cu sindicato SEPPA a manda prome cu eleccion, a bisa cu ta momento pa Aruba bandona e politica tradicional cu ta uza cada eleccion. Secretario General di SEPPA Magaly Brito a bisa cu e canamento cada cuatro aña di cas pa cas, ponemento di bandera y borchi no ta valido mas.
E ta kere cu pa ora e politico yega pa goberna, ya caba el a lubida tur e sugerencianan cu el a haya durante e canamento.
Pero mas cu tur cos, SEPPA kier un gobierno participativo cu ta bay den consulta cu pueblo, sea por medio di referendum of encuentronan.
Ta importante, el a bisa, pa tuma tres of mas tema importante cu pueblo lo kier mira pa wordo ehecuta. Laga pueblo dicidi riba e proyectonan, kico ta prioridad di e pueblo. Esaki ta exigi pa e pueblo tambe ta mas participativo den e encuentronan y pa ta mas critico, inclusive di bo mesun Partido.
El a menciona tambe cu Servicio Publico, ta algo cu henter pueblo ta haci uzo di dje. Den 2020 a keda proba cu e funcionnan di mas abou ta hopi importante. E mester ta un servicio di calidad, pero tin otro factornan pa tene cuenta cu nan, manera hermentnan pa traha y infrastructura. Sin esakinan, e servicio lo sigui bay atras. Kibra LMA no ta e solucion. E ta simplemente un contracto colectivo. Kibra esaki ta trece conflicto. Si kier yega na otro por medio di consensus, no por busca e tipo di conflictonan na e momentonan aki.
Sin servicio sanitario, transporte, etc., Aruba lo no por a enfrenta e pandemia manera esaki a sosode. Aunke tin cosnan cu ainda por mehora pa tin un servicio di calidad.
Aruba mester cuminsa traha cu reserva, pasobra creacion di debe ta haci Aruba esclavo di un sistema y ta trece soberania y democracia na Aruba den peligro, Brito a bisa.