SEOUL, Zuid Korea – Zuid Korea y Merca a realisa awe ensayonan conhunto cu misilnan balistico como respuesta na e test ehecuta pa Pyongyang, unda cu e regimen Noord Koreano a sigura cu el a prueba esaki cu exito un misil balistico intercontinental (ICBM).
E dos aliadonan aki a realisa multiple lansamento di misil den direccion na e Mar di Hapon, entre nan e modelo balistico Zuid Koreano Hyunmoo-21 y e tactico Mericano ATACMS, segun un vocero di e Ministerio di Defensa di Seoul a bisa na e agencia local Yonhap.
E ensayonan a tuma luga riba ordo di e presidente Zuid Koreano, Moon Jae-in, kende a acorda e respuesta aki na e ultimo provocacion di Noord Korea, cu su homologo Mericano, Donald Trump, e oficina presidencial di Seoul a informa.
E regimen cu Kim Jong-un ta lidera, di su parti, a sigura awe cu e modelo nobo di misil balistico intercontinental (ICBM) cu a test diamars aki por transporta un cabes nuclear di gran tamaño, segun e agencia estatal KCNA.
E misil nobo, bautisa Hwasong-14, a alcansa un haltura maximo di 2802 kilometer y a recore 933 kilometer den 39 minuut y segun medionan oficial Noord Koreano, “ta capas di golpia cualkier parti di mundo.”
E prueba nobo aki ta supone un enorme avance den e programa armamentistico di e regimen di Kim Jong0un y a causa e condena un biaha mas di e comunidad internacional.
Den e sentido aki, e secretario di Merca, Rex Tillerson, a insisti awe den e necesidad di un “accion global” pa detene e “menasa mundial” cu e desaroyo di e programa nuclear di Noord Korea ta pone.
Tillerson a sigura cu Merca “ta condena energicamente e lansamento pa Noord Korea di un misil balistico intercontinental” y a adverti cu e “prueba di un ICBM ta representa un escalada nobo,” cu loke a confirma cu tabata trata di e prome lansamento exitoso di e tipo aki di parti di Noord Korea.
Fuente: www.lavanguardia.com