Un poco despues di 1’or di marduga diferente unidad a bay na un adres na Tanki Leendert unda cu un señora a yega cas cu dos tiro. E hecho mes a tuma luga banda di Cas Casuela.
Na yegada di patruya na e sitio e casa di e señora ta conta cu su señora tawata pasando banda di Cas Casuela ora cu el a sinti un impacto den su auto y despues e ta wak sanger na su curpa mesora el a core bay su cas for di unda el a yama Central di Polis, conta su casa y di biaha el a bay hospital pa tratamento. Na hospital a bin constata cu e señora tin dos perforacion di bala.
Mesora a pidi pa departamento di recherche , polis tecnico di Cuerpo Policial.
E situacion di arma na Aruba ta alarmante. Den e caso aki probablemente e señora tabata un persona inocente pasando na mal momento. Un dia prome caba tabatin un tiramento na San Nicolas, unda e hoben Marc Mejia a ricibi impacto di bala fatal.
E aña’ki tin seis caso di asesinato den shete luna. Tristo ta cu mayoria ta personanan hoben, sea como victima of como agresor. Tin e situacion tambe na Hulanda cu e mucha homber sospecha di a tira e periodista Peter de Vries ta un Arubiano.
Pa Cuerpo Policial por resolve mas caso cooperacion y informacion di pueblo di Aruba ta hopi importante pesey nos ta pidi si bo tin cualkier informacion jama nos tiplijn: 11141. Nos ta garantisa cu bo ta keda anonimo.