Diadomingo anochi habitantenan di Rooi Koochi a reporta na polis di un señora di edad cu ta canando suso y ta perdi, polisnan di districto di San Nicolas di biaha a sali fo’i warda y cuminsa cu un buskeda, polisnan a cuminsa cana full e mondinan di Rooi Koochi unda a señala e persona ultimo, helicopter di Polis tambe a lanta vuelo di biaha y a duna un man fo’i halto.
Despues di algun rato di buskeda, e oficialnan den e helicopter a mira un señora canando suso en mondi cu un palo den su man y cu ta mustra cu di berdad e wowo a bruha cu a tuma otro ruta. E helicopter a keda lusa e señora y asina e oficialnan a yega y a topa cu e persona perdi. Polisnan contento cu a logra di haya e señora y e señora di edad ta contento y gradici cu esfuerzo cu polisnan a haci p’e.