Den e dianan aki, publico por a lesa den corant un lista di ID cu a keda publica, specialmente pa esnan cu a ricibi un carta pa por confirma cu ta na Aruba. E lista di ID ta e di dos fase cu Censo ta aplicando pa asina por registra ken ta na Aruba y ken no.
Den caso publico no a wak esaki den corant, esta Diario y/of Solo di Pueblo, por busca e lista di ID door di subi website di censo, cual ta www.censo.aw/opschoning, segun sra. Chong di CORE NV.
Tur tres lista lo wordo publica riba e website aki cu mas informacion. Ta pidi tur esnan cu tin interes pa por fabor subi riba e website aki y check si e ID ta wordo menciona den e tres publicacionnan aki.
Un biaha mas, pa esnan cu nan ID ta wordo menciona den un di e tres publicacionnan, ta pidi cooperacion pa pasa mas lihe cu ta posibel na e meldingsfaciliteit na Sabana Blanco y provee e datonan corectamente pa e registro di populacion di Aruba.
Chong a sigui splica cu CORE NV ta bezig cu e pasonan corespondiente pa check via varios paso. Tin varios actividad cu nan lo haci pa purba localisa e personanan aki. Dado caso no logra constata cu e persona realmente ta residencia na Aruba of pa medio di un carta, of pa medio di publicacion di ID y mas stapnan cu lo conclui, tin cu saca afo cu en berdad e persona no ta residencia na Aruba y finalmente loke por pasa ta un uitschrijving for di registro di populacion.
Chong a comenta cu dado caso cu e persona wordo uitgeschreven a base di e investigacion cu ta haci, ta referi na Censo e ora pa e cana e caminda pa wak kico ta e medidanan cu e tin cu tuma y kico ta e instancianan cu e tin cu pasa pa asina regla su asuntonan.
Ta mas di 9 mil hende ta ser busca y no por pone nan nomber, si no ta pone e number di ID so, segun sra. Chong.
E ta sigui splica esaki ta datonan personal cu no por pone sin mas den corant pa tur hende mira, ta ken ta esnan cu eigenlijk ta yamando. Ta pidi comprension di cada un persona pa toch check cedula, wak si bo ID ta aparece den e publicacion pa asina pasa na dado caso si e ta necesario.
Si en caso cu e persona no renoba su cedula, Chong a splica cu e no ta sigur si e persona ta cay den e lista aki, pero si en caso cu e cedula caduca y ta pensa cu lo tin cualkier cos robes, toch check, pasobra loke ta bezig ta wak ta e adresnan. Coy e cedula, wak kico ta e ID nummer, wak si e ta aparece den e listanan aki. Si e no ta aparece den e lista aki, no mester preocupa e cabes. Si en caso e aparece den e lista aki, e ora si mester pasa na Sabana Blanco 68-C.