Aruba Beach Club ta un hotel cu brandweer tabata bezig ta trahando riba dje pa basta tempo den e parti di prevencion di candela cu nan ta pone atencion riba candela. Segun Ferdinand Ponson, vocero di Brandweer, a splica cu tin papiamento cu ta bisa cu e smokenan detector no a bay on, pero e candela no a cuminsa paden di e edificio, sino pafo, di manera cu e no ta bay activa e smoke detector. Security di e hotel a ranca e poule station, avisando e hala di e hotel, di manera cu nan por a ehecuta e plan cu nan tabata tin riba papel, evacuando e edificio, pa ora cu brandweer a yega, no tabata tin hende den e edificio. Solamente personal cu tabata purba evita pa e candela no crece.
Personal di Aruba Beach Club a actua bon. Den e sentido di guia e turistanan, bahanan na e caminda di mas safe posibel y hibanan, manera cu tin palabra, leu di e candela. Eynan nan por a haci un headcount pa sa cu tur hende tabata eynan. E ora e personal mes por a percura pa wak kico nan mes por a haci pa por a paga e candela aki. Door cu nan no a logra, ora cu brandweer a yega, nan a take over y haci e trabao di paga e candela, y domin’e pa e no sigui expande.
Ponson a mustra cu hopi hende ta puntra dicon a haci druk pa saca tur hende. Tin un procedura na hotelnan cu nan no tabata sa unda e candela ta. Ta mira e huma, ta mira tur cos, pero no sa unda el a origina, si e por pasa den plafond, bay den e cambernan. Candela ta un fenomeno cu no por predici con y unda e ta bay asina lihe, si no ta entrena riba dje. Cu e ta core, e por bay di un camber pa otro camber. E candela no mester yega den otro camber pa e por pega algo na candela, sino e temperatura cu ta pasa door di e muraya cu ta haci esey, cu ta pone tur loke tin den e camber, ta subsetibel pa cende candela e momento ey. A evacua den e manera di mas miho cu nan por a haci.
Ponson a sigui splica cu e cambernan no a haya ningun daño. Ta asina cu e parti di e plywood unda e dak di e toren ta sinta, esey ta loke a pega candela. Door cu tabata tin asfalt papier riba dje, ta loke a haci mayoria di e huma. Parti paden di dje mes, den e elevatorshaft, no tabata tin hopi huma. Si el a haya awa, ora cu brandweer mester a haci trabao y e compania mester a warda un rato pa nan por a saca e awa y laga e seca bon pa nan por sigui traha riba parti di e elevator pa tur cos ta bon.
Pa loke ta e otro hotelnan, nan mester ta bon prepara, pasobra nos ta papia aki di no 4 piso, sino 10, 12, 16 piso. Mayoria di e hotelnan ta trahando bon cu e departamento di prevencion. Nan ta bezig ta mantene nan mes pa drecha loke mester wordo drecha y tin tur cos up to date. Ta importante pa un hotel tin un firepump. Ta un exigencia pa tin un sprinkle system. Den dje ta test e fire pump pa wak si e ta traha. Ta laga e awa circula, pa e ora por wak cu e presion ta baha y na cuanto e presion ta activa. Esey ta loke ta bezig ta haci pa basta aña. Despues di esey ta haci un test di alarma. Ta bay unit pa unit, ta activa e smoke detectornan, test wak con e ta bay. E persona cu ta haya e alarmering, den e caso aki ta bay front desk, esta PBX, ta wak y por dirigi e personal di e hotel mes na e punto unda cu e alarma bay on, pa nan por verifica unda tin e candela, si tin un candela y mira kico por a causa e candela. Por ehempel un toaster lo a kima pan y a causa huma. Tambe si tin un candela ta yama brandweer di biaha, di e manera aki por despacha e trucknan pa por yega na tempo eynan.
Cu un drone, nan por a mira kico por tabata motibo di e candela aki.
Trainingnan regular na hotelnan ta tumando luga. Den sector di horeca, nunca un trahado no ta keda na un solo hotel. Of e ta cambia di posicion. Ponson a splica cu tin trainingnan cu ta pasa inhouse, y tambe ta yama brandweer tambe pa nan prepara nan. Miembronan di e departamento di preparacion, ta bay sinta eynan y duna score. Tur aña e hotelnan tin cu duna un update di nan preparatie plan. Brandweer ta sinta score y si tin algo pa drecha, ta dreche y entrege bek y e ora e hotel por haci un training cu tur dos afdeling ora cu nan ta cla cu tur dos departamento pa por tin’e asina registra, segun Ponson.
Brandweer tabata atento riba e yamada cu a wordo haci. No tabata den oranan di mas cristian, pa lanta hende cu tabata tin un candela. Ta di spera cu yamadanan asina por tuma luga y cu hendenan lo coopera automaticamente, habriendo caminda, pasobra esey ta otro motibo. Tabata tin autonan para no na e luganan mas adecua, cu a stroba na cierto momento cu brandweer por a drenta cu e unidadnan.