Aruba Softball Bond cu ajudo di Subsidie Commissie a logra manda un selecion femenino U18 pa prome biaha den historia pa competencia di CONSURSA. Durante reunionnan internacional cu presidente di Aruba Softball Bond a atende na April e aña aki na Valencia y den luna di September na Monterrey por a compronde cu e vision di WBSC (World Baseball and Softball Confederation, Softball Division) ta exigi pa Federacionnan rond mundo cuminsa enfoca riba programanan pa hobenan entreotro U16 y U18. Paisnan den Sur America manera entreotro Argentina, Brasil, Peru, Venezuela cu tin esaki super bon desaroya pero kier logra sera e gap entre e paisnan aki y otronan den region. Asina exigencia ta pa traha den cada continente y no solamente continente America. Selecion di Aruba ta pasando den su prome experiencia hustamente contra paisnan ariba menciona y mas cu claro esaki lo ta un experiencia unico tanto pa nos atletanan y tambe nos staff technico pa asina por traha un programa di desaroyo cu por fit den e nivel desea. Actualmente na Cartagena tin un di e instructornan mas conoci den Americas esta Luis Perdomo kende tin un contract cu Argentina y den apenas 2 aña por tuma nota con hopi Argentina a desaroya su nivel. Diahuebs awor e tecnico aki lo duna un curso gratuitamente di 3 ora riba peticion di CONSURSA na tur e Tecniconan di paisnan presente pa asina brinda un guia con pa desaroya pa e otro nivel. Klaro Techniconan so no por logra tur cos y esaki ta bin den un combinacion di capacitacion di nos tecniconan pero tambe e pasion, amor y dedicasion di nos atletanan. Aruba Softball Bond kier gradici alabes Casa Haime pa na aporte pa Seleccion U18 por a yega na nan uniform. Tambe kier gradici tur cu di un of otro manera a aporta. Softball U18 femenino ta conociendo un desaroyo nobo. Cu perseverancia pronto nos lo ta competitivo den e categorianan aki.