E siman cu a pasa, 2 seleccion juvenil di Aruba (Girls U14 y Boys U14), a percura pa ful un ambiente di alegria cu nan weganan na e Caribbean Challenge Series, organisa pa Caribbean Football Union na Santo Domingo, Republica Dominicana. E finalna di diadomingo a haya un acogida enorme y tabata tin un ambiente manera mundial. Pa Aruba ta promer biaha cu ta particpa cu un categoria U14 femenino. E selección Girls U14, a desplega un futbol di un bon nivel, ganando 4 wega, anotando 22 gol na fabor y haya ningun gol contra. Den e final, a enfrenta e equipo di Turks and Caicos, cu a Aruba a gana caba den e ultimo wega di e grupo cu score di 1 – 0. Den e final cu a tuma lugar den e Estadio Olimpico Felix Sanchez, Aruba a tuma control di e wega for di trempan. Na di 7 minuut caba Aruba ta bai ariba, despues den e prome tempa ainda, Aruba ta amplia e score 2 – 0. E di dos mitar di wega, e patronchi di wega a keda mescos, cu Aruba dominando, Aruba ainda ta anota e di 3 gol y esey ta e resultado final tambe. Un pabien grandi na tur e muchanan di e Girls U-14, cu a demostra cu e futbol femenino tin un bunita futuro su dilanti. Alavez mester remarca cu e staf tecnico a consisti di solamente hende muher.
E seleccion Boys U14 tambe a demostra un tremendo futbol, ganando 2 wega y empata 1 (contra Boneiro). E mucha hombernan a anota 21 gol y a haya solamente 2 gol en contra. E final a bai entre Aruba y Boneiro. E wega aki tambe a tuma lugar den e Estadio Olimpico Felix Sanchez. Boneiro ta bai ariba 1 – 0, despues ainda den e prome tempo, Boneiro ta anota e di dos gol. Despues di halftime e seleccion di Aruba ta Sali pa busca e gol y a haya dominio di e wega. Aruba ta logra anota e gol di corta ventaha. Pero poco despues Boneiro ta logra anota e di 3 gol y asina tambe e resultado a keda 3 – 1 na fabor di Boneiro. Pero e selección di e mucha hombernan tambe tin un bunita futuro nan dilanti.
Un Pabien pa tur e muchanan y tambe e staf tecnico di tanto e mucha muhernan cu a Sali campeon, como e mucha hombernan cu a Sali sub-campeon.
