Directiva di Aruba Softball Bond trahando duro pa engrandese softball den su totalidad a bay ricibi Seleccion Femenino U18 kendenan a regresa diasabra ultimo for di Cartagena, Colombia. Promer biaha den historia un Seleccion den e categoria aki a bay competi den campeonato di CONUSRSA cual a tuma luga na Colombia. Esaki ta trata di un competencia entre selecionnan di henter un pais cual ta haci e nivel uno hopi pisa y competitivo. Riba nivel internacional WBSC (World Baseball and Softball Confederation) ta stimula Federacionnan miembro pa traha hopi riba e hala hoben cu ta muchanan desde 15 pa 19 y inscribi seleccion di Bo pais pa competencianan internacional den Bo region pa desaroya e nivel aki. Paisnan manera Brasil, Argentina, Peru, Mexico pa nombra algun cual ta cay den categoria di paisnan bon desaroya tabata presente na Cartagena. Aruba como ehempel a perde 11-7 contra Argentina cual pais a bay cas cu medaya di Brons. Aruba a perde tambe cu Brasil 6-0 cual pais a gana Oro. Pues e experencia cu Aruba a trece bek cas unda tanto e Staff tecnico bou di encargo di Fano Croes cu Coach Milly y Waika y tambe e atletanan cu a participa ta uno di hopi significacion. Por a hunga contra esnan mas desaroya y midi nos forsa pa sa unda mester sigui traha pa vera e gap y bira mas competitivo dentro di un aña. Notabel tabata por ehempel cu pitchernan femenino di 16 pa 18 aña ta bulando enorme creando un bon velocidad cu hopi movimiento den nan lansamento. Compromiso desde awor ta pa Aruba adapta na e manera di pitcheo internacional y comberti nos pitchernan femenino cu e habilidad di usa esaki na nos bentaha y pues siñando nos pitchernan tambe pa bula ora nan ta lansando pa crea e extra velocidad. Tur esaki regla internacional ta permiti. Asina tin hopi tecnicanan cu nos lo bay traha riba nan den e categoria aki. Aunke Aruba su seleccion tabata hopi jong cu bastante atleta entre edad di 14 pa 16 aña y apenas 2 di 18 aña Aruba a sa di por a duna bon bataya. Mesora ASB a haci e compromiso cu Staf Tecnico y atletanan cu entrenamento den e categoria aki lo continua tur diaranson desde diaranson entrante na veld di Pos Chikito y manera e fecha di proximo competencia ta conoci pa cu 2017 lo aumenta e training na 4 bes pa siman. Un palabra di gratitud na Subsidie Commissie pero tambe na Casa Haime cu a patrocina un set di uniform nobo y na Sr Milton Croes a facilita un di dos set di uniform pa Aruba por a luci den exterior. Softball den pleno desaroyo.