Recientemente e seleccion U23 di volleyball a sali pa nos isla ruman di Boneiro unda nan lo hunga e torneo internacional di 2018 CAZOVA U-23 Caribbean Championship e dianan 21 te cu 25 di juni proximo.
Caribbean Zone Volleyball Association (CAZOVA) kier crea mas competencia entre e paisnan Central y Caribe specialmente pa nos hobennan por explora nan mes miho den e deporte aki. E seleccion lo ta bou guia di e coach nacional Daan Kleinbussink. Mester bisa cu Aruba lo hunga contra Surnam, US Virgin Island, Corsow y Boneiro. Nos hungadornan a hiba un preparacion debido di varios luna y awor ta cla pa enfrenta e cuatro paisnan menciona. E weganan lo wordo hunga den e compleho Jorge Nicholas Sports Hall.
Dos aña pasa, e seleccion femenino a hunga un World Qualification Tournament na Aruba mes cu tabata un bon momento pa reviva e deporte di volleyball. Nan a enfrenta Haiti, Martinique y Surinam cual den tur tres wega nos volleybolistanan a duna un tremendo bataya y di nivel halto.
Stichting Sportsubsidie Aruba tambe a yuda subsidia e biahe di e seleccion femenino di volleyball U-23 pa e torneo internacional 2018 CAZOVA U-23 Caribbean Championship na Boneiro.
Cumprando weganan di Lotto, e Loteria di Aruba bo ta contribui na deporte riba nos isla. Meta di Fundacion Lotto pa Deporte ta pa organisa loteria, cambia bida di su hungadonan y na mes momento inverti den deporte local pa medio di donacionnan na Stichting Sportsubsidie Aruba.