Aña pasa Aruba a logra gana tur premio maximo den e Dutch Caribbean Championship den e deporte di tennis di mesa. Nos atletanan a hunga na cas y e respaldo di e publico tabata tremendo. E aña aki e pais di Surinam lo host e torneo di Dutch Caribbean Championship na e ciudad di Paramaribo. E weganan lo tuma lugar e dianan 5 pa 9 di October proximo y lo conta cu participacion di Aruba, Boneiro, Corsou, Surinam y St Maarten. Lo hunga individual y den ekipo, mientras e categorianan lo ta U-11, U-13, U-15, U-18, Open y Masters.
Mester bisa cu e seleccion a prepara lunanan largo pa e torneo aki, cu varios ora di preparacion intensivo,e entrenamentonan y claro e weganan hunga contra di otro den e torneonan di Copa Teams como tambe e ranking di tur luna. Cu otro palabra nos hungadonan tur ta bon prepara pa e competencia aki y e gana di triunfa tey cerca cada seleccionado. E hungadornan cu lo competi pa Aruba den e Dutch Caribbean Championship na Surinam ta Robert Dirksen, Chingho Chung, Jeandry Mathilda, Jean Claude Hoek, Mario Lobo, Andy Gomes, Alfred Leong, Franklin Lopes. Como coach lo biaha Ruddy Raga, mientras e hefe di delagacion lo ta Gregory Mathilda.
Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e delegacion di tennis di mesa pa e Dutch Caribbean Championship den tennis di mesa na Paramaribo, Surinam.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.