Diaranson 18 di juli ultimo e seleccion di Aruba Karate Bond a biaha pa Willemstad, Corsou unda nan lo participa na e ‘4th Caribbean Karate Championship Curaçao 2018’. E seleccion
di Aruba Karate Bond ta consisti di 6 atleta en total, cual nan ta Maresha Tromp, Janilaine Bello, Silvana Agudelo, Kevan Prada, Alejandro Gonzalez Lujan y Kevin Lugo.
E seis prospectonan aki a wordo selecta for di tur e scolnan miembro di Aruba Karate Bond. Nan preparacion tabata den man di e ekipo di coach di Aruba Karate Bond, kende tabata tin e tarea pa haci diferente test y monitoria nan preparacion. Segun ‘Sensei’ Alberto Gonzalez -assistant coach di Aruba Karate Bond- e ta convenci cu Aruba tin tur oportunidad pa trece medaya ya cu e karatekanan ta bon ekipa y preparapa enfrenta cualkier oponente tanto fisicamente como mentalmente.
Hunto cu e team di seleccion a biaha tambe, algun boluntario (mayornan di e karatekanan) y Sensei Felix Tromp, presidente di Aruba Karate Bond. ‘Sensei’ Felix Tromp ta acompaña e
team pa percura pa tur logistica cana na ordo. Mas cu claro su persona lo percura tambe pa tur relacion cu Corsou keda intacto y asina sigui yuda otro como islanan ruman den karate. Aruba Karate Bond ta desea e karatekanan hopi exito.
Un danki special ta bay pa Comite Olimpico Aruba (COA), Aruba Sport Unie (ASU), Stichting Sportsubsidie Aruba (SSA) y Lotto pa Deporte cu ta sostene karate di Aruba y a haci realidad e participacion na e ‘4th Caribbean Karate Championship Curaçao 2018’.