DEN HAAG, Hulanda- E iglesia evangelico Bethel situa na Den Haag, for di dia 26 di october te celebrando misa sin interupcion dilanti di decenas di fielnan cu no ta stop di drenta y sali pa no lag’e bashi. No ta trata di bati niun record, sino di evita di un famia di refugiado Armenio, contra di cual tin un orden di detencion y deportacion di e pais.
Según ley Hulandes, ni polis ni ehercito por drenta den luganan di culto mientras ta celebra un servicion religioso. P’esey pastoor y fielnan tin mas di un luna yenando e misa dia pa dia mas durante e 24 oranan di dia, den cual no ta stop di celebra misa pa autoridadnan no a probecha un buraco sin misa pa detene e famia Tamrazyan.
Famia Tamrayzan a yega Hulanda na 2009 huyendo di e menasanan di morto cu e tata di famia, Sasun, pa su papel como activista opositor na Armenia. Según Quartz! ta informa, husticia Hulandes a dicidi di dunanan asilo politico despues di varios aña di proceso hudicial. Nan a eligi e region di Katwijk, caminda nan tin 9 aña bibando. Pero algun siman atrás un hues a revoca e decision aki y na september a manda un orden di deportacion valido pa tur e miembronan di e famia, incluyendo e muchanan, cu a adapta nan mes perfectamente na scol y e custumbernan Hulandes.
Nan apelacion no a duna e resultado spera, ya cu e orden di expulsion no tabata tin marcha atrás. A trabes di rednan social, un di e yiunan di famia Tamrayzan a pidi yudansa na politico y activistanan di derechonan humano sin respuesta. E unico opcion viabel tabata di refugia den un misa, di unda cu nan no ta sali desde 26 di october ultimo.
“E tata di famia tin un gran posibilidad di wordo asesina na Armenai. Y e muchanan ta bibando pa nuebe aña akinan y a crea raiz akinan”, un vocero di e iglesia evangelico Bethel na Euronews, cu ta spera cu e situacion wordo soluciona lo mas pronto posibel y e famia por haya un permiso definitivo pa keda Hulanda”.
E promotor di e iniciativa aki ta e pastoor evangelico Theo Hettema, cu no solamente esun cu a bin cu e idea, sino cu e tambe tabata esun cu a cuminsa duna e prome misa. Desde e dia ey, un luna pasa, su palabranan tabata un mensahe directo na gobierno despues di varios hora di debate interno den e seno eclesiastico. “Niun misa mester ta den posicion di mester kies entre e respet pa gobierno y e respet pa dignidad humano”.