TURKIA – Seis persona a wordo deteni diaranson despues di incendio na bispo di un residencia estudiantil femenino cu a laga 12 morto y 22 herido zuid di Turkia, e agencia di prensa Doga a informa.
E seis personanan, entre nan ta responsabel di e residencia, ta sospechoso di “homicidio door di negligencia” den e incendio di e residencia Aladag, provincia di Adana, e agencia a indica.
Den e incendio a muri 11 residente, tur menornan di 14 aña y un empleado, segun medionan di comunicacion.
E candela a wordo causa pa un faya riba e red di coriente y a extende rapidamente debi cu e edificio a wordo cubri cu palo paden.
E vlamnan a come e edificio durante tres ora prome cu e bomberonan por a pag’e.
Segun e prome investigacionnan, e curpa di e vitimanan tabata cerca di e porta di emergencia, cu evidentemente nan no a logra habri.
“Parce cu e porta di e trapi di emergencia tabata cera cu yabi,” e alcalde di Adana, Huseyin Sozlu, a declara.
E residencia tabata tin un capacidad pa 54 studiante di secundaria y na e momento di e candela, tabata tin 34 residente, e gobernador di Adana, Mahmut Demirtas, a señala.
E residencia ta wordo administra pa un institucion religioso dirigi pa e comunidad Islamico “Suleymanci.”
Fuente: NTN24