NEW JERSEY, Merca (AP)- Un severo brote viral den un centro di rehabilitacion di New Jersey “pa muchanan den condicionnan medico fragil” a provoca e morto di seis menor y ta laga otro 12 malo, segun e Departamento di Salud di New Jersey.
A regista 18 caso di adenovirus den e Centro di Cuidado y Rehabilitacion Wanaque na Haskell, na 50 km (30 miya) noordoost di New York, e departamento di salud di New Jersey a informa den un comunicado.
E Centro pa Control y Prevencion di Malesa a indica den un email cu nan ta brindando asistencia tecnico na e estado. Durante e ultimo 10 casonan raporta na Merca, tabata tin casonan di malesanan grave y mortonan a causa di e tipo di infeccion cu a haya den e luga, segun e vocero di CDC Kate Fowlie, aunke e cantidad di victimanan fatal no ta conoci.
E origen di e malesa cu ta afecta mas tanto mucha, ta relaciona cu malesanan respiratorio agudo, segun CDC, cu riba su portal ta instrui trahadonan den e sector di salud pa raporta cantidadnan inusual na e departamento di salud local y estatal.
E Departamento di Salud no difundi e edad di e victimanan ni tampoco a aclarea e seriedad di e otro 12 casonan.
E seis mortonan tur tabata di e luna aki, segun e vocero di e Departamento di Salud, Donna Leusner.
A duna ordo pa no tuma mas pashent te ora cu e virus wordo eradica y cu e Departamento di Salud bisa cu aparentemente e cantidad di casonan ta reduciendo.
Dr. William Schaffner, profesor di malesanan infecciosos den e Centro Medico di e Universidad di Vanderbilt, a bisa cu e tipo di mortonan aki no ta comun.