Segun lider di PDR Andin Bikker: Gobierno no a haci nada pa contraresta problema cu asbest

Lider di Partido Democracia Real Andin Bikker, ta urgi gobierno pa haci un estudio basa riba esun haci na Hulanda tocante asbest.
Den rueda di prensa Bikker a bisa cu claro cu ta dificil pa soluciona e problema di asbest, y algun aña pasa no tabata tin ni un idea que asbesto no ta safe, pues na varios cas tin. Pero tambe na Hulanda tin diferente edificio cu a wordo traha cu dak of a wordo isola cu asbesto, pasobra un tempo e material aki tabata e miho cu por a uza.
PDR a bin cu un plan awor y esey nan a propone na 2012 tempo cu un paar di scol a wordo cera pa por a cambia e daknan y cu tur hende por corda.
Segun Andin Bikker Aruba mester haci un estudio mescos cu na Hulanda unda awor nan ta uza un likido cu ta basha riba e dak te ora por cambie. Nan ta bin cu diferente producto cu por uza den transcurso di diez pa diescinco aña y cu ta neutralisa tur e casnan cu por representa un peligro pa salud publico. Pero Gobierno te e dia di awe no a haci nada cu por discerni riba e tema aki y en todo caso ningun tipo di plan, similar na esun di Hulanda, a yega Parlamento.
“Pesey PDR ta urgi gobierno, no solamente e Minister encarga cu Infrastructura sino tambe e Minister encarga cu Salubridad cu por ripara cu ta hopi ausente pa adresa e tematica aki. Si nan no por, warda ora tin eleccion cu PDR ta bay adresa esaki cu ta un propuesta desde 2012 y awor nos ta den e di dos kwartaal di 2016, bayendo casi pa fin di aña pa habri 2017, anto e Gobierno aki no a haci nada riba e situacion di asbest” segun lider di PDR.
Andin Bikker a bisa cu netamente ta e personanan humilde ta pasa den e situacion aki. Esun cu tin manera ta cambia e dak pero esun humilde ta huur un vivienda chikito pero gobierno no ta haci nada pa drecha e problema y duna subsidio na esnan afecta, y manda companianan cu kizas tin e likido pa contene e riesgo cu e material aki ta causa.
“Pero saki ta tarea di gobierno pasobra obviamente e personanan sea e huurdo of e propietario, si nan tabata tin e manera pa haci esey nan lo a haci’e pa hopi tempo caba. Pero di Gobierno mester bin un incentivo y PDR den Gobierno lo bin cu esaki den nomber di salubridad publico pa nan por contene situacionnan indeseabel” Andin Bikker a laga sa.

Comments

comments