Durante di e conferencia di turismo Happiness 360, pa prome biaha a revela cifra di e indice di felicidad di nos isla. E meta di e estudio ta pa investiga e conexion entre felicidad y turismo.
E proceso di coleccion di informacion pa e encuesta a separa sexo, edad y luga (bario). E meta tabata pa encuesta 500 persona, sinembargo a encuesta 465, cual segun Robertico Croes cu a presenta e resultadonan ta un cantidad suficiente pa trece informacion valioso pa Aruba. Desde 2011 pa awo tin mas cu 2000 encuesta colecciona tocante e topico aki. 78% di e populacion ta considera nan mes como un persona feliz. Si bo compara esaki cu e rapport di felicidad mundial di mas recien (2016), e porcentahe aki ta coresponde cu e paisnan di mas feliz na mundo manera Dinamarca y Suisa. “Bo no por compara nan cu exactidud como cu nan a uza un otro model pa yega na nan calculacion, pero pa loke ta porcentahe nan ta casi mesun cos”, Sr. Croes a bisa.
Minister di Turismo, Transporte, Sector Primario y Cultura, Otmar Oduber a forma parti di e panel unda cu a trata e estudio di e indice di felicidad na Aruba. El a expresa cu e ta sumamente contento cu e resultado di e encuesta pasobra e ta refleha no solamente e ser humano y ken nos ta para p’e, pero tambe historia di decisionnan cu a wordo tuma ta esunnan corecto. Sin importa ken tabata e politiconan e ultimo decadanan, cu a contribui na haci comunidad mas contento.
‘Mi ta kere cu definitivamente felicidad ta e aspecto cu bo ta ‘care’ pa un otro persona y pa haci otro hende su preocupacionan bo preocupacionnan pa purba resolve esaki’.
Pa loke ta e cifranan cu a bira conoci di e indice di felicidad na Aruba, Minister Oduber a bisa cu e tin hopi di haber cu e colaboracion cu tin cu sector priva, esaki no ta tocante Gobierno y maneho. “Mi ta mira e resultado y mi ta mira e forsa y posibilidad di forma un team cu sector primario, pa nan tambe adapta y adopta e mesun medidanan den nan negoshi. Haci’e parti di e maneho general den e strategia pa e añanan nos dilanti. Gobierno por haci su parti pero sigur tin hopi cu por wordo haci den e sector priva”, Minister Oduber a bisa.