E multinacional Suiso Nestle ta enfrenta un peticion formal di parti di algun di su accionistanan, cu ta exigi e empresa pa aumenta significativamente su catalogo di producto sano, argumentando cu tres cuarta parti di su benta ta bin di alimento poco saludabel, segun Bloomberg, cu ta cita e documentonan oficial.
E coalicion di accionista, entre nan tin e organisacion benefico ShareAction, dedica na promove inversion saludabel, a emiti un resolucion caminda cu nan ta pidi Nestle pa fiha obhetivo pa aumenta benta di alimento mas saludabel y aplica e normanan internacional riba alimento sano.
E demandanan aki ta tuma luga mientras cu e presion riba e empresanan alimentario ta crece pa produci un variedad di producto mas sano, memey di e aumento di e problenanan di salud relaciona cu mal nutricion. P’e mediidanan ta mas aproba, mester ricibi por lo menos e respaldo di 50% mas un voto den un votacion cu lo tuma luga na april, durante e asamblea anual.
Anteriormente, ShareAction ya a critica Nestle pa depende demasiado “di benta di alimento poco saludabel” y no haci lo suficiente pa impulsa e benta di producto nutritivo. E combersacionnan al respecto cu a entabla for di e momento ey a yega na un punto morto.
Segun Catherine Howarth, director ehecutivo di ShareAction, “tres cuarta parti di e bentanan mundial di Nestle ta di producto poco saludabel cu ta contene nivel halto di salo, sucu y vet.” Di su parti, e compania ta sigura cu e datonan aki ta eroneo, y ta recorda cu Nestle tabata e prome compania den midi e balor nutricional di su productonan cu un sistema di clasificacion aproba pa gobierno.
