Den cuadro di e trabao di renobacion grandi y expansion di Rosa College, e contratista, sub-contratista y diferente otro instancia y compania envolvi a emiti informacion na comunidad pa cu e trabaonan cu ta cuminsa dialuna.
Kita plaachinan cu ta contene asbest for di un edificio ta un proceso cu ta bay di acuerdo na exigencianan y proceduranan hopi streng determina pa DTI (Dienst Technische Inspecties). DTI a certifica algun compania pa haci e trabao aki, y ta efectua controlnan hunto cu e companianan envolvi den e proyectonan.
Departamento di Salud Publico tambe ta parti di e team cu ta envolvi den e proyectonan aki. Leslie Escobar, kende ta traha cu e departamento huridico di DESPA y ta parti di e team di inspeccion di salud, a laga sa durante di un sesion di informacion cu prensa, cu cada proyecto ta wordo trata cu e mesun atencion pa detaye y tin un team cu ta haci e planning completo.
E planning ta inclui medidanan severo di precaucion, avisonan cu ta bay pa tur instancia, scol, y cas den e area, preparacion meticuloso di e trabao.
Escobar a laga sa cu no tin mester di preocupa hopi como cu e medidadanan di precaucion a wordo tuma pa e trabao na Rosa College cu ta cuminsa dialuna 17 di October y tin un duracion di tres siman. E orario di trabao ta di 7’or di mainta pa 4’or di atardi.
A pesar di cu durante di e trabao tin midimento di e aire continuamente, y controlnan intensivo di e trabaonan tumando luga, Escobar ta pidi di parti di DESPA pa comunidad tene na cuenta cu e trabao aki ta andando y pa yuda baha e trafico den e area, tanto pa esunnan cu ta pasa den auto como muchanan di scol y adultonan cu ta pasa na pia banda di e scol.
E area ta protegi cu heki y cinta di precaucion pa ningun hende drenta riba e tereno, y e bisiñanan – tanto e negoshinan y scolnan como e habitantenan a haya e avisonan y consehonan di precaucion cu ta conta pa tur proyecto, grandi y chikito, cu ta envolve asbest.
Roysy Koolman, kende ta traha cu Total Services den e departamento di “air quality” (calidad di aire), a subraya cu asbest ta keda un material peligroso riba su mes, y p’esey tur trabao ta wordo haci segun e exigencianan y reglanan di DTI. E sistema di traha, cu tur control na nan luga, ta dunando bon resultado na tur proyecto su compania tabata envolvi den dje.
Koolman ta agrega cu e ta spera cu e nivel aki di siguridad por keda manteni tambe. El a splica cu loke Total Services ta haci, ta pone pompnan di aire den cierto areanan – esaki por cambia diariamente dependiendo di e direccion di biento – pa tuma un test di e aire. E material cu ta wordo colecta ta wordo manda tur dia pa un laboratorio y dependiendo di e resultado, e trabao di e contratista por sigui of mester wordo para pa haci adaptacionnan.
Na e nivel di 0.1% caba ta para e trabao. Nan ta hopi estricto y precies cu e controlnan, pa ta sigur cu e calidad di aire ta keda bon, tanto pa e trahadonan mes, como pa tur persona cu ta of ta pasa den e area. Koolman a bisa cu nan experiencia cu diferente contratista na Aruba ta hopi bon.
Enrique Maduro di DTI a subraya cu tur caminda cu cualkier trabao pa kita asbest ta tumando luga DTI y tur esunnan envolvi ta trata cu hopi delicadesa. Sa pasa cu trabaonan ta tuma luga sin conocemento previo di DTI y habitantenan di e area ta tuma contacto cu DTI of Polis.
DTI ta pasa check con e trabao ta wordo haci y cu cua compania. Si no tin un contratista certifica trahando riba e proyecto, DTI ta para e trabao. Si DTI nota cu cualkier di e rekisitonan no ta wordo cumpli cun’e, nan ta para e trabao.
Maduro ta confirma cu e asbest cu ta bay kita for di dak di Rosa College ta di “clase 1” cual no ta kibra ni garna facil y no ta bula lihe den aire. Tur medida ta na nan luga, DTI lo pasa controla e trabao y tin Total Services tambe cu ta haciendo e controlnan estricto di aire.