Autoridad di Colombia a informa diamars cu a detene un muhe di 25 aña, acusa di horta hende homber despues di seduci nan a traves di aplicacion di cita y cu tabata busca den 180 pais.
Paola Parra, alias ‘La Pretty’, a wordo captura pa Polis di e Departamento di Antioquia n’e aeropuerto internacional Jose Maria Cordova di e municipio Rio Negro, cu ta sirbi Medellin, ora cu e kier a sali for di e pais rumbo Republica Dominicana.
Riba Parra, di nacionalidad Colombiano, tabatin un alerta cora di Interpol, despues di a comete un serie di delito na Brasil y otro nacion.
Coronel Carlos Andres Martinez Romero, comandante di polis Antioqueño, a detaya cu e muhe “tabata dedica na seduci hende homber stranhero” a traves di aplicacion pa cita manera Bumble.
Den un di e casonan cu ta investigando, e muhe lo a suministra un substancia na un ciudadano Brasileño pa lag’e inconsciente y despues hort’e mas di 25 mil dollar.
Fuera di esey, a haya sa cu e lo a tuma contacto cu varios turista cu tabata bayendo rumbo Santo Domingo y Punta Cana y e tabatin conocemento p’e maneho di divisa a traves di aplicacion di finansa digital.