Invitadonan hopi satisfecho cu e conferencia Happiness 360 y e informacion treci pa dilanti. E amabilidad di nos hendenan ta keda resalta como motibo pa bishitantenan ta mas satisfecho y ta haci cu nan kier bolbe bek Aruba.
“Esaki tabata un di e reunionnan di mas importante y significante cu mi a yega di forma parti di dje”, Taleb Rifai Taleb Secretario General di United Nations World Tourism Organization (UNWTO) a expresa. Tempo y luga ta hopi importante y crucial, pa bishitantenan ta feliz y contento pero tambe satisfaccion ta un punto crucial den e mensahe di World Tourism Organization (WTO). Mi ta kere cu Minister Otmar Oduber a tuma un bon decision pa loke ta e tema, tempo y luga di e conferencia, pasobra tur ta cuadra.
Sr. Rifai ta considera Minister Oduber como un bon amigo. “Mi a topa cun’e e ultimo dos añanan aki na diferente evento y conferencia. E ta un tremendo representante di Aruba y ta dedica na servicio di su hendenan y e ta un persona inteligente cu hopi ambicion. Sigur cualidadnan cu nos kier di representantenan di pueblo awendia”. Pa loke ta e introduccion di e indice di felicidad den nos maneho, a puntra Sr. Rifai pa su opinion. El a bisa cu pa tin e prome isla di Caribe pa adopta e indice aki y su concepto ta un punto hopi significante. Na final di e dia, hende cu ta contento ta refleha esaki riba nan bishitantenan y bida ta bira mas rico. Hopi problema cu tin na mundo lo wordo resolvi si hende ta mas contento y satisfecho cu nan bida. Hopi tension, falta di tolerancia y inhusticia cu tin actualmente (mundialmente) ta resultado di hendenan cu no ta sinti satisfecho cu nan bida. El a enfatisa cu esaki no ta encera e bienestar economico solamente, sino satisfaccion den tur aspecto, satisfaccion total. “E concepto aki a wordo comprondi hopi bon pa e minister y mi ta admira su iniciativa pa loke ta esaki”.
Sr. Rifai a papia cu diferente studiante di universidad cu ta den training pa educa nan mes riba turismo. Mi a ofrece 4 luga pa training na Spaña na e miho studiantenan. Esaki ta habri e posibilidad pa e studiantenan ricibi mihor conocemento y experiencia, pa nan regresa Aruba bek cu perspectiva internacional mas amplio. E proceso di seleccion lo wordo laga den man di ATA y esnan encarga cu administracion na universidad entre otro.
Un mensahe cu Sr. Rifai kier a duna na e trabounan di Minister Oduber pa loke ta turismo ta: “Keda haci locual cu bo ta haci. Minister ta haciendo un tremendo trabou y e mester djis continua cu esaki pasobra e mision ainda no a wordo cumpli. E agenda ta uno yen y uno corecto pues mi ta spera cu ta keda consistente y cu determinacion.
Mientras tanto, Mayra Álvarez García, Viceministra di Turismo di Cuba a bisa cu e conferencia “tabata un experiencia hopi importante unda cu a debati riba temanan cu ta fundamental pa e desaroyo turistico, temanan hopi actual pa paisnan manera Cuba cu ta den mesun zona geografico. Ta mira e ocasion aki manera un oportunidad pa sigui busca puntonan cu tin en comun y pa busca conexion cu ta fortalece e posibilidadnan cu cada un di nos islanan tin”.
Terminando el a bisa cu e tabata un cita tremendo y e ta hiba un gran experiencia di e evento y e isla. “Un isla excelente, hopi bunita y unda cu mi a sinti calor di tur habitante cu ta haci cu a pesar cu mi ta bay, mi kier bolbe bek”, Sra Alvarez Garcia a bisa.