Cada aña, e federacion mundial di triathlon ITU ta pone nan Congreso Anual caminda e deliberacion, refleccion y conclusion cu e demas miembronan rond mundo ta puntonan di agenda cu mester wordo trata. Pa ITU, e evaluacion riba e aña deportivo cu a transcuri y kiko tur mester wordo haci pa keda engrandece e deporte di triathlon ta primordial. Pa e demas miembronan e ta hopi importante pa congresonan ser atendi pa e representantenan maximo di nos federacionnan deportivo, esaki pa un continuacion positivo na e desaroyo di e deporte di triathlon.
Secretaria general di Aruba Triathlon Association, sra. Glenda Croes-Tromp a biaha pa Rotterdam, Hulanda unda su persona a atende e 2017 ITU Congress, e edicion number 30 di e federacion mundial di triathlon. Aña pasa esaki tabata na Madrid, Spaña. Durante di e congreso a papia riba topiconan manera desaroyo mundial di e deporte, e diferente competencianan na nivel regional, continental y mundial mientras ITU lo dispone dipone cursonan pa engrandese e conocimento di e dirigentenan y coachnan. Mester bisa cu prome cu e inicio di e Congreso a tene 1 minuut di silencio pa Les McDonald, un miembro honorario y alabes Hall of Fame di ITU. Na bida sr. Mc Donald tabata Presidente di ITU di 1989 te cu 2008 y Presidente di Triathlon Canada pa hopi tempo.
Un danki sigur na Lotto Aruba pa medio di Comision di Subsidio cu a subsidia e biahe di Aruba Triathlon Association pa e di 30 congreso annual di e federacion mundial di triathlon, ITU na Rotterdam, Hulanda.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.