WASHINGTON, D.C., Merca- Presidente Mericano, Donald Trump diasabra a anuncia cu e secretaria di Siguridad Nacional, Kirstjen Nielsen, defensor di primer fila di e politica migratorio controversial di su gobierno, lo bandona su puesto.
“E secretaria di Siguridad Nacional Kirstjen Nielsen lo bandona su puesto y mi kier gradici’e pa su servicio”, Trump a bisa den un tweet.
E mandatario a agrega cu e comisionado di Aduana y Proteccion Fronteriso, Kevin McAleenan, lo ta e secretario interino.
Nielsen a incorpora su mes na e gobierno di Trump na januari 2017 como asistente di e secrartio di Siguridad Nacional di e tempo ey, John Kelly. Ora cu Kelly a bandona Cas Blanco como hefe di gabinete na juli 2017, Nielsen a keda na di dos luga pero un par di luna despues e tabata bek den e Departamento di Siguridad Nacional, e biaha aki como secretaria.
Eynan el a bira e cara di e politica anti-migratorio den e administracion Trump, incluyendo e practica hopi critica di separa e menornan migrante for di nan mayornan.
For di basta tempo caba tin rumornan di cu e relacion cu Nielsen cu Trump ta uno dificil. Pero a pesar di reportenan di cu e mandatario tabata keha constantantemente riba su rendimento, el a keda leal.
Luna pasa el a defende e declaracion di emergencia nacional haci door di Trump pa garantisa e fondonan destina pa un di su proyectonan di campaña: e muraya na e frontera entre Merca y Mexico. .
Nielsen a duna orden na e comisionado McAleenan pa cuminsa operacionnan di emergencia y “inmediatamente aumenta su reasignacion temporal di personal y recursonan di e agencia completo pa aborda e afluencia di migrantenan”.
El a habilita ademas, e expansion di Protocolonan di Proteccion di Migrante (MPP), un iniciativa pa manda stranheronan pa Mexico pa nan spera eynan, e proceso di inmigracion di Merca. El a duna ordo tambe pa “debolbe mas di shen migrante adicional pa dia, riba e tasa actual di Mexico, conforme ley di Merca y obligacionnan humano”.