Na ocasion di e celebracion di 80 aña di existencia di ‘Hygienische Dienst’, esta Seccion di Higiena na Departamento di Salud Publico Aruba ta na su luga pa repasa brevemente e historia y trabounan importante di e seccion aki y su rol pa pais Aruba. Prome cu aña 1936 no tabata existi un Seccion di Higiena ni un maneho riba higiena na Aruba. Na aña 1921 na Corsou a pasa un ley “Hygienische verordening”, cual pa e tempo ey a ser considera suficiente base pa trato di higiena den un pais.
Establecimento di LAGO na 1924 a trece cune un importacion di trahadonan stranhero. Esaki, banda di a afecta e crecemento di e poblacion, a conduci tambe na un presion pa cambio structural den e forma di maneho di poblacion na Aruba. Aruba a conoce e tempo ey un aumento den vivienda di palo y zink caminda higiena general no tabata optimal. Desperdicio general incluyendo di e ser humano tabata ser benta den mondi pa wordo seca door di solo.
Na aña 1925 Aruba a cuminsa haya mas atencion riba tereno medico. Gobierno di Corsou a cuminsa manda dokter pa establece nan mes na Aruba.
Un “Bouwverordening” a bin na vigor na aña 1935, caminda a introduci como exigencia cu tur cas mester dispone di un WC.
Na aña 1936 “Hygiënische Dienst” a establece su mes na Aruba. El a wordo dirigi door di Rein P. Miedema, naci na Hulanda. Sr. Miedema a fungi como controlado di “Hygiënische Dienst” di 1936 te cu 1956 pa despues regresa Hulanda. Desde aña 1956 te cu 1960, Ernst R. Finck a fungi como hefe di “Hygiënische Dienst”.
“Hygiënische Dienst” di Aruba tabata resorta bou di “Openbaar Gezondheidsdienst” di Corsou. Estudio interno a pone man riba diferente corespondencia di parti director di “Openbaar Gezondheidsdienst” Corsou pa Gezaghebber di Aruba unda ta manda pidi relato di “Hygiënische Dienst” Aruba cu e peticion pa mehoracion di e servicio e.o. pa nombra mas personal pa controla “vuilverbranding”. Tambe a constata entre otro e instruccion e tempo ey pa no laga hende biba den cas cu no tin WC y tabata pidi pa recoge sushi di cas cu mas frecuencia.
“Hygienische Dienst” na su turno tabata manda relato pa Gezaghebber di Aruba mencionando cuanto certificado di “Ontratting” pa barco a ser otorga, e cantidad di desinfeccion di casnan pa motibo di malesa entre otro typhus. Tambe inspeccion di tiendanan cu a tuma luga y haciendo mencion caminda pan, manteca etc. no ta wordo bon warda pa stof y mencionando tambe e luganan caminda a constata hopi musca y restaurantnan cu tabata a-higienico.
Desde aña 1960 te cu aworaki “Hygiënische Dienst” a wordo maneha door di varios hefenan Arubiano, manera Fabian Kelly (1960 – 1984), John de Cuba d.f.m. (1984 – 1986), Humphrey Henriquez d.f.m. (1986 – 2005), Jozef (Frido) Maduro (2006 – 2008), Albert (Tico) Bremer (2009 – 2012) y desde aña 2014 te cu awor, Ludmyla Yvette Geerman.
Seccion di Higiena tabata situa den diferente edificio, e prome tabata na Zoutmanstraat 1. Na aña 1956 el a bin den e edificio di Gezondheidsdienst na Hospitaalstraat y desde aña 1982 te cu awendia e tin su propio edificio na dr. Oduberstraat 1.
Seccion di Higiena su tarea ta hopi amplio y ta encera entre otro e control di cuminda, bebida y sanitario. E ta duna servicio y ta supervisa bou di e siguiente leynan manera: “Warenverordening”, cu ta encera e calidad di cuminda y reglamentacion di higiena. “Vergunningsverordening” pa establecimento di horeca manera hotel, logement, restaurant, slijt. “Begrafenisverordening” na momento di sacamento di cadaver, control di graf, kelder na santana. “Quarantaineverordening”, pa dunamento di “Ship Sanitation Certificate” pa evita cu malesa infeccioso wordo transmiti internacionalmente. Ta controla calidad di awa di bebe, awa di lama, awa di irigacion. Ta duna informacion, traha riba prevencion y guia na e pueblo di Aruba riba tereno di salud en general.
Mirando e desaroyonan mundialmente riba tereno di tecnologia, Seccion di Higiena tin retonan hopi importante y interesante su dilanti pa yuda prepara pais Aruba riba innovacion y sostenibilidad pa loke ta trata tereno di higiena.
“Hygiënische Dienst” ta resorta bou di Departamento di Salud Publico. E tin un rol hopi vital den e infrastructura di Aruba unda servicionan indispensabel ta wordo duna cu ta hopi importante pa e bida diario di pueblo di Aruba y sector turistico.