NEW YORK (AP) — SEARS a logra un extension den su intento pa evita su desaparicion total. E accionista principal y alabes presidente di SEARS, Eddie Lampert, a gana un subasta di bancarota na New York, segun un fuente familiarisa cu e negociacionnan. E persona a papia bou di condicion di anonimato ya cu e no tabata autorisa pa discuti e tema.
Den e ultimo dianan, Lampert a aumenta e bet na mas di 5 biyon dollar.
Lampert, cu a hiba e compania na proteccion di bancarrota, lo por mantene e mas o menos 400 tiendanan SEARS cu a keda, cual ta nifica cu varios mil empleo ta keda salba. Al menos, p’aworaki.
Pregunta ta keda, si SEARS, funda 132 aña pasa, lo por sobrevivi e era di Amazon.
Na october, SEARS a presenta un solicitud di proteccion di Chapter 11 di e Bankruptcy Law di Merca. E tempo ey e tabata tin 687 tienda y 68 mil persona den servicio. Na e punto mas halto, el a yega di tin 4 mil tienda. Esaki tabata na 2012.
Lampert ta di opinion cu e compania ainda tin potencial, incluso si e tin cu competi cu no solamente Amazon, pero tambe cu Walmart, Target y tiendanan di descuento cu a habri nan mesun sucursalnan.
Bou maneho di Lambert, SEARS a sobrevivi door di segrega tiendanan y bende marcanan cu a bira sinonimo di e tienda, manera Craftsman. Lampert a saca di su mesun placa y a improvisa acuerdonan pa mantene e compania na laira, aunke criticonan ta bisa cu el a haci esaki solamente pa beneficia su fondo di cobertura ESL.
Cuater aña pasa, e compania a crea un fondo di inversion pa real estate pa haya ingreso di su cantidad grandi di propiedadnan. El a bende y huur mas di 200 propiedad di REIT, di cual Lampert ta un accionista importante.
Lampert ta doño di 31% di e accionnan di SEARS y su fondo di cobertura tin un participacion di 18.5%, según FactSet.
Lampert a merge SEARS hunto cu Kmart na 2005, dos aña despues di cu el a scapa Kmart di bancarota. El a hura di trece SEARS bek na su grandesa di antes, pero esaki nunca a sosode.
E compania, golpia pa e recesion di cual el a logra supera ora el a cambia e tendencia di e consumidor y cu rivalnan fuerte, e no tabata tin un aña rentabel desde 2010 y a sufri 11 aña consecutivo di disminucion di bentanan anual. Lampert a wordo critica pa e hecho cu e no ta invertiendo den e tiendanan, cu ya caba ta ‘outdated’.