Diasabra ultimo a tuma luga e evento nacional di Scouting Aruba, “Vossenjacht 2016”. Durante e dia tur e welpnan a disfruta di un mainta hopi placentero cu un variacion grandi di actividad. Vossenjacht ta un evento caminda ta duna e welpnan (muchanan entre 7 cu 11 aña di edad) informacion di diferente profesionnan cu tin den ramo laboral.
Scouting Aruba ta gradici Parke Nacional Arikok, tur park ranger, tur boluntario y lidernan scout cu a haci e evento aki un exito rotundo. Y mas cu claro un pabien na tur e welpnan cu a participa y haci e evento aki grandi.
E movecion scout ta existi desde aña 1907 y a wordo funda door di Lord Robert S. Baden Powell. Aki na Aruba a funda Scouting Aruba dia 23 di April 2000, uniendo 4 diferente organisacion scout den un. Scouting Aruba tin 13 grupo scout den diferente districtonan rond di full Aruba.
Na Aruba e historia di scout tambe bay te cu 85 aña atras, pero e organisacion Scouting Aruba, despues di a uni 4 organisacion hunto, ta existi pa 16 aña awor y ta e organisacion nacional representando e 13 gruponan scout riba nos isla, afilia na Inter American Scout Organisation (ISO) cu ta miembro tambe di World Scout Organization esta WOSM.
Scouting ta contribui na desaroya hobennan ehemplar pa bira lidernan den nos comunidad. Awendia Scouting ta e organisacion mas grandi na Aruba, cu mas di 500 miembro activo. E movecion scout ta existi desde aña 1907 ora cu Lord Baden Powell a cuminsa cune 108 aña pasa y cu lo keda existi pa semper pasobra “Once a Scout, Always a Scout”. Pa mas informacion por subi nan facebook page: http://www.facebook.com/ScoutingAruba.