Stichting Katholiek Onderwijs Aruba (SKOA) ta informa na tur mayor cu e tres scolnan na Paradera, esta Scol Preparatorio Nos Paraiso, Colegio Pastoor Kranwinkel y Maria Goretti College lo ta cera pa tres dia. Esaki ta relaciona cu e daño causa door di e huma procedente di e candela di e dump ilegal na Tamarijn.
Tabata dialuna mainta cu autoridadnan a keda informa di un candela basta grandi ariba e dump ilegal cu tin entre Tamarijn cu Seroe Lopez. E huma di e candela aki tambe a causa cu e scolnan na Paradera tambe a sufri algun daño, pa cual lo mester haci e reparacionnan necesario.
SKOA ta pidi su disculpa pa cualkier inconveniencia causa door di esaki, pero SKOA tin e deber di garantisa e salud di su studiantenan como tambe di su maestronan.