Sra. Arends-Reyes ta di opinion cu Aruba ta trahando sumamente duro ariba e introduccion di mas proyecto y posibilidad pa ‘opvang’ tanto pa mucha como hobenan. Nos sa cu e mayornan awendia tanto mama como tata ta mas participativo den e mundo laboral y e discusion pa e necesidad pa reenforsa e programanan y facilidadnan cu ta ofrece cuido y un disiplina manera arte, musica, deporte y baile ta birando mas central.
Ta bira hopi cla cu lo mester por cuminsa pensa ariba orarionan extendi di skolnan caminda cu muchanan y hobenan despues di skol merdia por keda scol y haña otro programa extra curricular cu lo yudanan enorme den nan formacion. Realidad ta cu tin demasiado mucha y hoben despues di skol ta keda cas y ta keda cas sin supervision cual ta inaceptabel. E fenomeno aki di ‘sleutel kinderen’ mester wordo disminui cu un plan nacional segun sra Arends-Reyes kende ta kere firmemente den proyectonan despues di merdia. Na Aruba e participacion di deporte ta bou di 20% y e cifra aki mester bai incremente.
A introduci varios proyecto traimerdia pa scolnan y hobennan pero ainda falta uno na nivel nacional cu ta acapara varios Ministerio hunto. Hopi mucha ariba nos isla ta hasi uzo di centro di cuido/creche cu ta ofrece cuido full dia te cu 5’or of 6’or di atardi te ora cu un of tur dos mayor caba di traha. Esaki tawata un conclusion despues di a bishita varios crèche y tambe estadisticanan. E ley cu Parlamento lo mester por trata den e luna venidero pa introduci e permiso, inspeccion y rekisitonan basico ta sumamente importante pa nos pais mirando cu tin necesidad pe y tur caso lamentabel na cada crèche ta uno dimas.
E ley aki di crèche a tarda pa traha riba dj’e mirando cu e producto final y te ultimo ainda tawatin contribucion di diferente stakeholder manera fundacion pa nos muchanan, doñonan di crèche, mayornan, gobierno y Parlamento. A presenta e concepto di ley varios biaha na Parlamento y ta fraccion di AVP so a manda pregunta pa gobierno y a pidi pa hasi cambionan necesario pa wak con por yega na cambionan den un periodo di transicion cu ta keda realistico y rasonabel pa e centronan. Esaki ta hustamente locual a tuma e ultimo tardansa pa trece e ley aki den un reunion publico y pa e caba di bira un realidad. A comprende cu lo bin un nota di cambio y lo presenta periodonan di transicion especialmente pa inversionan den infrastructura pa cada centro. E upgrading di e personal tambe lo conose un programa special ofreci pa gobierno y tambe tin su periodo di transicion. Un punto cu hopi crèche tawatin dificultad cune ta e ratio di cuanto leidsters pa cuanto mucha,esaki ta un punto caminda cu Aruba compara cu Hulanda of Curacao tin un ratio mucho halto pa cada leidster. Den e nota di cambio lo trece un proposicion pa asina yega na un cantidad balansa y realistico pa Aruba sin cu ta compromete e calidad y supervision cu mester por ofrece na nos muchanan, Sra. Arends-Reyes ta termina bisando.