SKOA ta traha pa basta tempo caba en cooperacion cu Telefon pa Hubentud, segun Sra. Josette Daal, directora di SKOA ta splica.
Ya caba ta un paar di aña cu a palabra cu den tur scolnan di SKOA ta implementa “Conscious Discipline” (Disciplina Consciente) y gran parti tambe door di Ministerio di Enseñansa cu a organisa e workshopnan aki. Tin scol ta mas leu cu otro. Kico ta Conscious Discipline? Esaki ta un sistema con pa siña e mucha con pa anda cu un otro persona. E no ta pa mucha so, e ta pa mucha pa mucha, maestro pa mayor y maestro pa mucha. E ta con pa anda cu otro, sin falta otro respet.
Segun Sra. Daal, bullying no ta un vak na scol, e ta un programa cu ta existi y ta biba den tur e scolnan cu ta cay bou SKOA. Un paar di aña pasa, Telefon pa Hubentud a haci un sondeo den diferente scol unda SKOA a coopera cu mas of menos ocho scol, nan a haci un sondeo con e nivel ta di bullying. Nan a haci un assesment y despues a educa e muchanan con pa anda cu otro, y despues nan a bolbe haci un assesment y e porcentahe con pa anda cu otro positivamente, ta subi. Dus e programa ta biba den nos scolnan. Pa SKOA esaki ta hopi importante, ya cu nan ta un instancia di educacion y como tal mester educa e muchanan cu ta bay bo scol. Mester siña e muchanan tambe, con pa anda cu otro. Mucha ta keda mucha, naturalmente, segun Sra. Daal y bo mester inverti basta tempo pa siñanan kico por y kico no por, con pa papia cu otro. Esakinan ta formanan di norma y balornan, di siñanan di no dal, di no tenta otro, siña nan respet. Tur e aspectonan aki, ta biba den e scolnan di SKOA.
SKOA ta pone hopi enfasis ariba esey, pero ora cu ta traha cu mucha, segun Sra. Daal, mester pensa ariba nan bida tambe. Nan bida no ta scol so, nan tin un bida pafo di scol. Hopi biaha no sa kico nan experiencia ta pafo di scol. Un biaha mas, Sra. Daal ta enfatiza cu nan ta pone hopi enfasis ariba esaki. Door cu ta mucha, e proceso con pa educa un mucha, con pa anda cu otro, ta tuma tempo. Y den scol, enberdad, tin mucha cu ta tenta otro. Esey no kiermen cu maestro of e instituto no ta wak esey. Nan ta wak esey, pero e proceso pa bo siña y educa un mucha. E bon ta, ora cu mayornan ta coopera cu esey tambe. E ora bo tin un triangulo, e mayor, e scol y e mucha, unda cu den forma di un triangulo ta siña y educa e mucha con pa anda cu otro.
Responsabilidad y actitud di mucha, ta cay primordialmente bou di e mayornan. Un mucha ta bay scol 5 ora pa dia, unda cu e maestro ta dun’e les. Pero den e 5 ora nan ey tambe, e maestro ta educa e muchanan tambe pa mehora nan comportacion, unda cu mester. E resto di dia, ta pa e adulto cu ta responsabel pa e mucha. Lo ta hopi di aprecia, aunke hopi ta haci esaki, pa e mayor educa nan yiu, follow up riba tipo di cosnan asina.
Sra. Daal a sigui bisa, cu ta 5 ora di scol e mucha tin, unda cu tin un rooster. Pero e liña cora cu ta core den e scolnan ta, ta e parti di formacion. E lo ta ideal si scol, dus e triangulo, scol, mayor y mucha, traha hunto. Pero comunidad tambe ta hunga un rol dne formacion di un mucha. Kico nos tur kier, segun Sra. Daal. pa e hoben di awe ta un adulto responsabel y respetuoso den nos comunidad. Esey ta e meta di e formacion.
Cual ta e pasonan cu SKOA ta tuma ora cu presenta casonan di bullying? SKOA tin e parti di “Conflict Protocol”, dus e muchanan ta wordo siña, kico ta wordo verwacht di nan, y vice versa, pa nan amiguitonan di scol. Ariba esey SKOA ta traha.
Ora muchanan malcomporta nan mes y no tene nan mes na regla, nan mester para responsabel pa nan actonan y nan ta haya un sancion. P.e. e mucha ta haya un waarschuwing. Den casonan extremo, si en caso cu e mucha haya tres waarschuwing, lo por sigui un schorsing. Pero no ta schors so, pero schorsing cu un programa. Y ora di bay scol bek, ta sigui cu e programa na scol.
E sistema cu SKOA ta uzando den scolnan basico, ta funciona. Tabata tin muchanan cu tabata tin comportacion fastioso, pero cu cooperacion di mayornan, y cu Conscious DIscipline e muchanan a mehora. Si e comportacion mehora, e ta score mas miho tambe den su lesnan. Por mira tambe, su concentracion ta bira mas miho y su atencion pa su lesnan tambe ta bira mas positivo, segun Sra. Josette Daal, directora di SKOA.