Tur e scolnan participante den Good4theNeighborhood 2016 a drenta e fase di ehecucion di nan propuesta. Despues di simannan di preparacion y brainstorming pa asina completa nan propuesta cu tur e rekisitonan di nan plan, awor tur e scolnan ta den preparacion pa ehecuta locual cu nan a presenta.
Aruba Bank ta sumamente orguyoso di e plannan ambicioso, sumamente creativo y deportivo cu a wordo entrega.
Ibero American Highschool lo traha un ‘Recreation –and Sport Platform’ na nan scol unda esaki lo por wordo usa pa studiante, maestro, mayor y otro miembronan di nos comunidad pa recreacion, deporte, educacion fisico.
Maria College Mavo ta enfoca riba personanan cu limitacion. E reto di nan proyecto ta pa pone e grupo aki di nos comunidad hasi actividad físico, y asina nan tambe por gosa di e beneficionan di biba un bida mas activo den e “Fitness Circuit” cu lo wordo crea pa nan.
Colegio San Antonio lo introduci ‘The Actively Dushi App’ conhuntamente cu un jingle pa educa nos comunidad riba e topico di actividad físico. Y tambe nan lo organisa 6 actividad y lo wordo culmina cu un scavenger hunt.
Colegio San Nicolas lo organisa un ‘Col San Nature Adventure Walk’ cu lo ta un evento anual unda ta duna tur participante e oportunidad pa experencia luganan den bunita di nos naturalesa combina cu varios actividad.
Filomena College Mavo ta organizando 3 dia di actividad físico pa bario di Savaneta te cu San Nicolas, unda nan meta principal ta pa educa y motiva e personanan di bario y nan propio scol pa biba un bida mas saludabel.
E scolnan tin un periodo di 4 siman pa ehecuta nan proyecto cu ta conta cu e sosten di Aruba Bank y cu ta enfoca riba actividad fisico den nos comunidad.