Scol di Musica Rufo Wever su concierto tabata fantastico. Pa Addonsito Croes : Mi ta cuminsa e articulo aki gradiciendo cada maestro, cada studiante y cada dirigente pa e honor brinda na mi persona pa por tabata e maestro di ceremonia principal den e concierto di fin di aña escolar 2018.
Cas di Cultura completamente yena cu mayor, amigo y famia di e studiante nan, a disfruta di e mas cu 20 presentacionan di nivel halto cu a keda presenta. E bunita di e publico tambe ta cu esaki tabata consisti di artista nan grandi cu den nan bida a scirbi historia musical inmortal na Aruba. Cada un di nan a bini pa admira y aplaudi e artistanan hoben y adulto di Aruba su scol di musica.
Grandi tabata e aplauso cu cada artista hoben y adulto a ricibi. Un biaha mas a keda demostra cu e maestronan ta traha duru pa saca e maximo talento musical for di cada alumno.
Tambe mi kier recorda Aruba henter cu dia 20 di september 2018, Scol di Musica Rufo Wever lo celebra e 65 aña nan di su exsistencia cu un opendag cu ta priminti di ta uno hopi bunita.
Pabien scol di Musica Rufo Wever bao direccion di maestro Chucho Hoek y nos ta spera cu pronto nos planta di television nacional por comparti e concierto aki cu Aruba henter.