E temporada di vakantie e aña aki lo ta uno hopi dibertido pa e mucha y hobennan di Aruba. Scol di Musica Rufo Wever ta presenta pa prome biaha ‘Aruba Music Camp’.
‘Aruba Music Camp 2018’ lo cera e participantenan conoci cu e diferente instrumentonan y tecnica musical; ta trata aki di Drumset & Percussion, Violin, Piano y Canto.
Pa hopi mucha of hoben e ta un soño pa siña toca un instrument of canta. Pues pa e motibo aki Scol di Musica Rufo Wever kier yuda haci e soño nan aki realidad por medio di Aruba Music Camp 2018
Musica ta e disciplina mas promovi tanto local como internacional; esaki ta scucha tur caminda; Na radio, na TV, durante live shows y na fiesta. Tur mucha y Hoben gusta canta y nan ta wordo motiva por medio di musica.
Pa loke ta lesnan di Drumset & Percussion, Violin y Canto di‘Aruba Music Camp 2018’ lo tuma luga na Scol di Arte, Pastoor Hendrikstraat 103 San Nicolaas; cuminsando 9 di juli pa 3 di augustus 2018, di dialuna pa diabierna. E camp lo ta parti den dos seccion pa les; seccion 1 lo ta di 8:30 d mainta pa 11:30 di merdia y seccion 2 lo ta di 12’or di merdia pa 3or di atardi.
Cu excepcion di e Camp di Piano, cu lo tuma luga na “Rialto Piano Lab”situa na Steenweg 4 den centro di Oranjestad; cuminsando 9 di juli pa 3 di augustus 2018, di dialuna pa diabierna. E camp lo ta parti den dos seccion pa les; seccion 1 lo ta di 8:30 d mainta pa 11:30 di merdia y seccion 2 lo ta di 12’or di merdia pa 3or di atardi.
Mas cu claro e orgaisadonan a tuma bon nota cu pa inclui transporte den e pakete special aki pensando pa facilita tur mucha y / of hoben cu a desea participa. Pa e participantenan cu ta biba na playa lo tin un servicio di bus cu lo busca nan na oficina di UNOCA cu ta keda den Stadionweg 21.
A regula tambe un programa (schedule) di bus pa hiba e participantenan Scol di Arte, San Nicolaas. E orario di ‘pick up’ pa participantenan di seccion 1 lo ta 7:45 di mainta y e orario cu lo ‘pick up’ e participantenan di seccion 2 lo ta 11:15 di mainta.
Poco ta organisa un camp special pa e temporada di vakantie riba un nivel halto pa un prijs atractivo.
Pa registra por manda un email na [email protected], incluyendo nomber completo di participante, edad, fecha di nacemento, e instrumento specifico di camp cu ta desea di asisti.
Pa mas informacion por tuma contacto cu Scol di Musica Rufo Wever na 592-6449.