E fin di siman aki e conocido Diana Antoinette hunto cu su Scol di Baile Diana Antoinette ta celebra 50 aña den e mundo di baile y folklore. Riba e fechanan 28 y 29 di april Aruba completo ta cordialmente invita pa presencia e magno evento aki cuta tuma lugar den nos Cas di Cultura.
Ta asina Sra, Antoinette ta splica cu e a la dicidi di no solamente celebra su 50 aña den e mundo artistico di baile pero na mes momento honra y celebra tur e musico, areglistanan y musica cu a inspire den e hornada aki.
Pues Sra. Antoinette y su yiu muhenan Alydia y Piere-Angely Wever no ta figuranan desconoci den e mundo aki, mirando cu nan tur 3 ta muhenan cu hopi influencia den e mundo artistico cu pa añas por medio di Skol di Baile a sa di carga Aruba su folklore y cultura dn halto, traspasando esaki por medio di baile, educacion y otro disciplinanan artistico pa e generacion nobo.
Manera por a compronde e show di fin di siman aki lo conta e storia di Sra. Diana Antoinette pa cu e 50 añanan den baile y cu lo culmina esaki mas cu claro na Aruba su folklore pa cual su persona semper a carga hopi cerca di su curason.
Durante e anochi aki Aruba lo tin e honor tambe pa sera conoci cu un bailarina internacional kende lo deleita e escenario di Cas di Cultura. Lo mas remarcabel di esaki ta cu e bailarina aki ta siñando e bailenan folklore di Aruba y cu na mes momento e lo carga esaki na momento e bay bek Hulanda.
Pa elabora poco mas riba e musica Srta. Alydia Wever a splica cu e concepto pa honra baluertenan den e mundo di musica ta pa invita cada baluarte pa sinta y disfruta di e show.
Cu esaki ta extende un invitacion na Aruba completo pa bin disfruta, aporta y sostene nos bailarinanan durante e magno evento 50 aña den baile di Scol di Baile Diana Antoinette, fechanan 28 y 29 di april na Cas di Cultura y ticketnan ta disponibel na Scol di Baile, Scol di Arte San Nicolas y Van Dorp & De Wit Store.