E aña aki Scol di Baile Diana Antonette ta cumpli su di 20 aña di existencia riba nos dushi isla di Aruba.
Cu un trayectoria di casi 50 aña den mundo di baile como baliarina, coreografo, y directora; Sra. Diana Antonette ta un docente di baile y di CKV dans reconoci riba nos isla.
Un docente semper masha kerí y stima pa tur su alumnonan. Sra. Diana a duna masha hopi persona, for di chikito te na grandi, lesnan di baile y workshop ariba tur nivel. Sea profesional, amateur, gruponan di baile y social.
Tambe studiantenan cu despues a sigui den mundo di baile, cu a bay studia baile y cu awor ta balia profesionalmente of ta docente di baile.
Directora di su grupo di baile “Teatro di Danza Arubano” cu ta existiendo pa 33 aña caba, cu ta activo y presentando tur caminda riba nos isla.
Scol di Baile tin diferente docentenan certifica cu pa hopi aña a traha cu estudiantenan riba diferente estilo di baile, cu hopi dedicacion, amor, y energia.
E edad di un studiante ta cuminsa for di 4 aña te cu adulto.
E curpa di e studiante semper ta e parti central di un scol di baile, como cu e curpa ta Ta e instrumento y ta worde guia a base di tecnica, disciplina, flexibidad, habilidad, coordinacion y formacion pa por crea un bon base pa por tin e forsa, estilo y liñanan, pa por eherce e bunita arte di baile.
Esaki sin duda ta yuda, stimula y motiva e studiante den tur su otro debernan y tambe lo mas importante nan educacion.
Pa cuminsa e aña nobo escolar di baile aki, scol di baile tin e grato placer di anuncia cu Kevin Kenrick Eduardo Jr. Gumbs lo ta na Aruba pa un paar di tempo despues di a caba UDA Utrechtse Dansacademie y ta den su delaster aña di Amsterdamse Hogeschool voor de Kunsten pa duna nos studiantenan algun les.
Esaki lo ser duna tambe na Scol di Arte naSan Nicolas.
Sra. Alydia Wever, yiu muhe di Diana Antonette, ya caba tin 12 aña riba nos isla. Cu despues di a bin bek for di Merca, tambe ta coreografo, docente y tambe directora artistico di Teatro di Danza Arubano.
Sra. Alydia lo cuminsa cu lesnan nobo den e estilo di baile clasico y baile moderno pa studiantenan di edad di 7 aña pariba.
Directiva di Scol di Baile ta masha contento y gradeci na su studiantenan pa nan dedicacion y nan mayornan pa nan cooperacion!
Nos ta yama un Bon Bini na un aña di baile escolar nobo pa tur nos alumno y alumnonan nobo.
Si tin interes y lo ta desea pa sa mas informacion di Scol di Baile Diana Antonette por yama na 5826379/ 5676691of 5937409. (Situa den e edificio patras diCas di Cultura)
- Latest
