Aunke un dia prome caba Gobernador a informa cu e lo no huramenta Benny Sevinger como Parlamentario te ora cu e ta afo, toch e grupo Aruba kier Husticia a acudi pafo di Parlamento diahuebs dia di huramentacion Parlamento nobo.
Nan tabata hopi contento cu e decision. Den e carta cu e peticion cu 5 mil firma, a haci un peticion na Gobernador pa no ehecuta e huramentacion. E grupo tabata y ta di opinion cu na momento cu Sevinger sali, e lo por huramenta ainda.
No ta di awo e grupo a bin ta trahando riba e situacion aki. Ya prome cu eleccion a manda carta pa Conseho Electoral, pero a informa nan cu legalmente no por haci nada pa evita esey. Y su sak’e su mes, esey ta nifica cu e por drenta Parlamento. Esey a sosode y a dicidi pa no para. A cuminsa cu un accion di firma unda a logra colecta mas cu 5 mil firma. No ta discuti si e mag drenta of no. Solamente wanta su asiento te ora cu e logra drecha su asunto.
Mirando cu Gobernador a dicidi pa no huramenta Sevinger, e ta kere cu e accion di firma a yuda. “Gobernador a uza e parti moral. E decision cu el a tuma a haci henter e pueblo content y trankil. Si Benny demostra su inocencia, e por drenta pasobra su luga ta ward’e. Cu un consenshi limpi.”
Un di e prome cosnan cu mester bini riba mesa awo den Parlamento ta hustamente screening di Parlamentarionan. Y den esaki Sevinger no por huramenta cu consenshi limpi, mirando e situacion den cual e ta actualmente.