Pa e awasero cu Aruba a conoce den fin di siman sigur tabata positivo pa damnan. Randy Maduro di Santa Rosa ta splica cu diadomingo mainta a habri cu un sorpresivo awasero torencial, caminda cu net despues di esaki, Maduro mes a sali un rato pa por a bishita diferente dam cu tin rond di Aruba. A enfoca mas tanto den e bario di Santa Cruz, Tanki Leendert, Noord, Tanki Flip, pa asina mira cua ta e damnan cu sigur ta yen of practicamente full y damnan cu a bay over. A cuminsa na dam di Cas Ariba, caminda cu esaki tabata na e momento ey tabata tin poco awa ta core via di rooi, yenando e dam y dam tabata full e momento ey. Despues a sigui pa Sabana Grandi. Tambe tabata full. Rooi Bosal tambe tabata full. Sabana Grandi a cuminsa bay over di e labado, kiermen esey practicamente a bay over. Despues a continua pa loke ta trata esun di Rooi Afo cu tabata full completo, cu a bay over. El a cuminsa pasa riba labado, asina a sigui bay den e rooinan cu DOW mester a cera e camindanan otro banda. Despues a sigui pa Noord, tambe completamente yen. Tanki Leendert ainda por ta tabata tin algun espacio pa awa y Tanki Flip completamente yen. Damnan ta completamente yen na e momentonan aki y sigur nos cunukeronan local lo ta sumamente contento. Alabes Santa Rosa ta haci un apelacion pa esnan cu ta biba cerca, pa asina tene cuenta tambe, paga bon tino pa e muchanan cu kisas awendia ta hopi tribi di bay cerca, bay hunga na e dam. E tera mes ta satura, hera por cay den otro. Damnan ta hopi yen di awa, kiermen esaki por forma un peliger pa esnan cu ta biba den cercania of pa e muchanan cu ta bay hunga mas tanto rond di dam, den dam, pa tene bon cuenta cu esaki.