Normalmente no sa tuma luga pero semper tur cu ta interesa pa haya un amplio bista di kico tur ta tarea di nos departamento di Agricultura, Cria y Pesca ta mas cu bon bini. E biaha aki ta e organo mas halto di nos consistucion cu ta miembronan di Parlamento di Aruba di bishita na Santa Rosa.
Tabata diabierna ultimo cu nos departamento a ricibi bishita di algun parlamentario den persona di sr. Normal Roos, sr. Jeffrey Kelly, sr. Donny Rasmijn pa loke ta fraccion di AVP den Parlamento. Sr. Andin Bikker pa e fraccion di PDR y sr. Juan Ady Thijsen pa e fraccion di MEP den Parlamento y acompaña pa griffier di Parlamento mr. sra Jaqueline Williams.
E Parlamentarionan a wordo ricibi pa nos directora di Departamento di Agricultura, Cria y Pesca sra. Nathalie Maduro den a hiba un combersacion di introduccion na nos departamento.
E recorido den Santa Rosa a cuminsa na e seccion di ekiponan pisa cu ta nos truck y tractornan pa asina nan por a haya un idea di kico ta e trabou di e ekiponan pisa aki.
Seccion di criansa di Porco a sigui cu un splicacion di e hefe di seccion cu ta sra, Rebecca Franken-Croes cu a splica kico ta e tipo di rasanan cu tin y kico ta e tipo di cruce di e diferente rasanan. Despues e parlamentarionan por a mira e seccion completo di cria.
Seccion di matanan local tabata e siguiente bishita. Sigui pa un splicacion amplio di kico ta e trabounan cu ta wordo haci pa coserva nos matanan local y mas importante matanan cu ta den extecion.
E recorido den Santa Rosa a sigui pa e seccion di Cabrito y Carne nan di rasa cu ta e “machonan” e asina yama e “Padrotnan” pa asina nan por a conoce e diferente rasa.
Tabata tin oportunidad di admira e Toro y Baca cu nos tin y tuma nota kico ta e tipo di rasa “Jersey” y su beneficionan pa cu nos clima.
Plantacion di “Hooi” cu Santa Rosa ta haciendo pa algun aña cu nan por a mira.
Un seccion tambe cu nos ta disponi ta e seccion di apicultura caminda cu e Parlammentarionan por a haya un amplio splicacion y desmostracion di nos apicultor cu ta Johnny Falconi. Asina nan por a mira e importancia di e abehanan cu nos tin na Aruba.
Sr. Facundo Franken tambe a splica un poco di nos matanan local y nan por a admira e “Jardin Local”
Un seccion cu na e momentonan aki no ta den funcion pero cu durante cu e seccion aki tabata cla nos tabata tin e oportunidad di a haci uzo y haci un plantacion di Lechuga Romano. E test aki a bay completamento bon. Nos ta papiando di e seccion di Hydrophonics.
Un bishita den nos cunuco caminda cu tin diferente mata di fruta planta y tambe nan a haya un splicacion di hefe di seccion cu ta sr. Ludwig Rasmijn. Aki a elabora riba e tipo di malesanan di mata manera cu tabata tin cu a matanan citrico y con esaki a wordo teni bou control via di nos departamento.
Nos a sigui cu e recorido pa e seccion di Criansa di Cabrito y Carne. Aki tambe e hefe di seccion cu ra sra. Rebecca Franken-Croes a splica e tipo ehemplarnan y kico ta e beneficion.
Pa finalisa e recorido den Santa Rosa nos a yega na “Cunuco Chabelito” cu ta nos Kinderboerderij pa asina tuma nota kico ta e function y e tipo di bestianan cu nos tin akiden.
Despues di un descanso chikito parti paden y algo referscante pa bebe e parlamentarionan sr. Donny Rasmijn di e fraccion di AVP, sr. Juan Adi Thijsen di MEP y Griffier di Parlamento mr. sra. Jaqueline Williams a sigui pa hasi un bishita na un cunuco cu ta di sr. Enrique Werleman na Kadushi Largo pa asina mira e cunucu di plantacion di Maishi Rabo. Sr. Enrique Werleman a duna un splicacion di su cunucu y su contratiemponan cu e tabata tin durante plantacion.
Nos ta sumanmente contento cu e bishita di nos Parlamento di Aruba pa asina mira e importancia di e sector primario cu ultimamente ta hayando cada bes mas acogida y nos hendena ta birando mas conciente. Sigur danki na e trabounan cu nos departamento ta haciendo concientisando pueblo di e importancia di haci bo mesun plantacion con chikito cu e por ta pa propio consumo.