Ken no ta corda cu ora cu ora bo tabata mucha semper bo tabata piki tamarijn pa come. Sea na scol tabata tin un mata of un bisiña of kisas na cas mes bo tabata tin un mata. Den mayoria caso berde mes bo ta piki tamarijn pa come. No ta nada cu e ta zuur, asina mes bo ta come toch. Na momento cu e “hecha” ta mas ainda bo ta piki. Tur ta cay for di e mata cu ta haci’e mas facil pa piki.
No tin nada mas dushi pabo tin matanan di fruta rond di cas. Den caso cu ta matanan cu bo sa cu ta crece grandi ta bon pa tene na cuenta cu esakinan no por wordo planta mucho cerca di cura of di muraya di cas. Di parti di Santa Rosa ta momento cu un cliente cumpra un mata local of di fruta cu ta matanan cu ta crece grandi nos ta duna conseho pa esaki mester wordo planta na un distancia di 3 meter of mas for di cualkier muraya. Esaki ta pa evita di haci daño na bo murayanan di cas of cura manera nos a menciona caba. Tambe ora cu e mata crece di tal forma cu e grandura di takinan no haci daño na e dak di cas. Ta puntonan di importancia cubo mester tene na cuenta na momento di bay planta un mata. No lubida cu na momento di planta un mata cu ta chikito esaki ta rekeri awa practicamente tur dia. Na momento cu esaki crece y bira grandi kisas no mester di asina tanto awa mas.
Un mata cu rekeri hopi solo. Den caso aki cu nos ta papiando di mata di Tamarijn. Un mata di tamarijn por crece y bira basta grandi. Nos ta papiando aki di un grandura di 15 pa 20 meter di haltura. Na Aruba nan por alcansa un haltura di mas of menos 8 meter. E ta un mata hopi comun na Aruba y hopi uza na mundo. E ta wordo uza tanto funcional, Artesanal y pa consumo. Originalmente e mata ta bin for di Africa y awendia Mexico ta e pais cu mas ta produci Tamarijn.
E blachinan di tamarijn ta wordo uza pa cushina of por come curu tambe. Den platonan Hindu e ta wordo uza hopi y tin te hasta Boullion di Tamarijn. Esaki tambe ta obtenibel na Aruba.
Un mata di tamarijn ta crece hopi grandi y aki na Aruba den temponan pasa nos grandinan tabata planta esaki na rand di plantacionnan pa motibo cu esaki ta kibra biento y ta duna hopi sombra.
Na momento cu tin tamarijn hecho hopi ta esnan cu ta piki e fruta pa por traha juice cune of come gewoon asina. Den caso bo bebe of come hopi e ta bira un laxante natural. Den mayoria caso e tamarijn ta hopi zuur. Ta masha poco bo por haya un mata cu ta smaak poco mas dushi y menos zuur. Mayoria biaha e ta hopi zuur.
E Dushi di tamarijn ta wordo hopi gusta y ta wordo traha na Aruba.
Den caso e mata ta planta for di simiya e lo por duna fruta den 5 pa 7 aña. Un mata di tamarijn ingerta ta den dos aña ya caba e ta duna fruta
Aki na Santa Rosa e matanan di tamarijn ta dunando hopi fruta na e momentonan aki. Bo por cumpra bo mata di tamarijn aki na Santa Rosa y plante den bo cura of cunucu.
Ban piki poco tamarijn pa nos por traha un bon warapo!