Recientemente, e comision di Parlamento encarga cu Labor & Sector Primario, pa prome biaha, a extende un invitacion na Gerencia di Departamento di Agricultura, Cria y Pesca conoci como Santa Rosa, pa un reunion y un presentacion ariba e plan di maneho y esfuersonan ehecuta. E distinguido Miembronan di Parlamento cu tabata presente na e ocasion aki, tabata Sr. Hendrik Tevreden como Voorzitter di e comision acompaña pa Sra. Louisette Christiaans-Yarzagaray, Sra. Shailiny M. Tromp-Lee, Sr. Endy Croes, Sr. Rocco Tjon, Sr. Edgard Vrolijk, Sr. Alvin Howell y Sra. Jacqueline Williams, PLV Griffier.
E presentacion a tuma luga, Diabierna dia 29 di Juni, caminda cu Sra. Nathalie Maduro, Directora pa e Departamento di Agricultura, Cria y Pesca, a duna un presentacion basta extenso y habri, splicando e diferente strategianan implementa y e diferente resultadonan y alabes e limitacionnan cu mester di atencion urgente, pa por logra desaroya e Sector Primario di Aruba den un forma optimal y dunando sosten na tur nos Productornan local. E otro representantenan di Santa Rosa presente, tabata Sr. Di-Angelo Schenker, Chef pa e Seccion Financiero y Sr. Randy Maduro, Relacionista Publico.
Na final di e presentacion, e Miembronan di Parlamento, tabata tin e oportunidad pa haci diferente pregunta, cualnan a wordo contesta di inmediato. Sr. Tevreden, como e Voorzitter di e comision, a gradici e delegadonan di Santa Rosa pa e presentacion y a expresa nan deseo pa por tin un contacto mas frecuente cu e Departamento, pa asina por keda na altura di tur e desaroyonan cu ta tumando luga cu e diferente proyectonan y estudionan cu lo bay tuma luga. alabes a keda acorda, cu e comision lo haci e preparacionnan necesario, pa e Miembronan di e Comision, por haci un bishita y recorido den Santa Rosa y bishita algun proyecto local, pa asina, por tin un miho impresion di kico Aruba su Sector Primario ta ofrece.