Diasabra 25 di Augustus San Nicolas ta invita pueblo bin experiencia un diasabra ameno den pleno ciudad. Diasabra awor tin mercado, tours, musica riba caja y tayernan creativo. Tambe e tiendanan y restaurantnan ta habri.
E mercado di San Nicolas, Sani Market e biaha aki atrobe ta ofrece un variacion di producto y cuminda den promenade di San Nicolas. No solamente por bin cumpra pero por gosa tambe di un ambiente caribeno y di diferente arte cu ta rondona e mercado. Sani Market ta tuma lugar di 09.00 am – 01.00 pm.
Si bo kier siña mas di e creatividad y cultura di nos hendenan, por registra pa e Art Walk Tour. Durante e walking tour aki lo siña hopi na Museo di Industria, e murales den ciudad di San Nicolas y Cosecha su tienda y centro creativo. E tour ta wordo duna door di un guia profesional. Registracion ta necesario y esaki por wordo hasi na 5847090. Prijs pa e tour ta 15 dollars pa persona y ta inclui tambe un botter di awa. E Art Walk Tour ta di 10.30 am – 12.00 pm
Tambe e mainta aki tin un bus tour cu lo bishita nos museonan bou di guia di e curator di Fundacion Museo Arubano. Despues di bishita Museo Historico na Oranjestad lo bin pariba pa sinja mas di nos herencia na Museo di Industria y di Community Museum. Tambe lo pasa Sani Market, e murales y Cosecha na San Nicolas. E special price pa local ta solamente 15 florin pa persona y lo tuma lugar di 09.00 am – 01.00 pm. Registracion ta necesario y esaki por wordo hasi na 5885199.
Na Cosecha tin un tayer creativo di Print Screening cu ta wordo guia door di e artistanan di Upsadaisy. Prijs ta solamente 50 florin y esaki ta inclui material y un refreshment. Tambe den tienda por haya mas informacion di tur e piesanan certifica cu nos localnan ta traha. Registracion pa e tayer ta necesario y esaki por wordo hasi na [email protected]. E tayer aki ta di 10.00 am – 12.30 pm.
Den un ambiente placentero den e terasa di Nicolas Store por pasa admira y tende mas di piesanan di Community Museum. Laga e guia di museo hiba bo back den tempo. E terasa ta habri di 09.00 am – 01.00 pm.
Wema San Nicolas ta ofrece un tayer special pa mucha pa sinja traha un desk organizer cu PVC pipes. Pa mas informacion y inscripcion por manda un email na [email protected]. E tayer ta di 11.00 am – 01.00 pm.
Pa mas detayes tocante e evento mensual Experience San Nicolas, bishita nos Facebook page Experience San Nicolas.