CARACAS, Venezuela- E ingresonan di Venezuela procedente di e benta di petroleo na MErca ta bou di menaza serio ya cu e sancionnan imponi riba e empresa petrolero estatal Petróleos de Venezuela (Pdvsa) a pone cu cumpradonan Mericano busca reemplaso.
Dialuna Merca a impone sancionnan riba PDVSA pa paralisa e envio di crudo di Venezuela, cu ta representa casi e totalidad di e exportacionnan di e pais, den respuesta na e reeleccion di e socialista Nicolas Maduro como presidente, den un votacion ampliamente condena como fraudulento.
Refinerianan di Merca cu ta depende di e crudo pisa di Venezuela ta recuriendo na e crudo agrio domestico pa compensa e impacto, mandando e prijs na nivelnan mas halto den e ultimo 5 añanan.
Otro alternativanan potencial manera Canada, Mexico of cualkier otro luga di America Latina ta dificil di sigura mei mei di un disminucion di produccion, un capacidad di reserva limita y problemanan den transporte, e reporte ta sigui bisa.
Prijsnan di crudo den general, a haya cierto mencion den noticianan, na momento di e sancion, pero e reaccion riba mercado tabata mayormente silencioso ya cu e falta di inversion, e mal maneho y e fuga di trahadonan a afecta e produccion di petroleo di Venezuela, cu ta na su nivel di mas abao den casi shete decada.
Pdvsa ta purbando di evadi e sancionnan di gobierno di presidente Donald Trump cu ta restringi pagonan pa su petroleo door di pidi e cumpradonan grandi, incluyendo rafinaderianan di Merca, pa renegocia e contractonan, cuatro fuente involucra den e combersacionnan a bisa.
Merca ta e consumidor di crudo Venezolano mas grandi, cu importacionnan di un promedio di rond di 500 mil bari pa dia (bpd) na 2018, según datonan di Refinitiv Eikon. “E region cu e deficit mas grandi di crudo Venezolano, ya sea a trabes di sancionnan of door di e caida den produccion, ta Merca”, Michael Tran, estratega di materianan prima di RBC Capital Markets a bisa den un comunicado.