MOSCU, Rusia- Diaranson Rusia a reacciona rabia ariba e sancionnan nobo di Merca. E Minister Ruso interino di Relacionnan Exterior, Sergej Ryabkov, como forma di protesta a cancela su reunion cu su colega Mericano Thomas Shannon.
Gobierno Mericano diamars a impone sancionnan contra di 38 persona y organisacionnan pa motibo di actividadnan Ruso na Ukraina, unda Rusia a anexa e peninsula Crimea. Tambe Moscu lo ta apoyando e insurgentenan separatisa den e parti oost di e pais.
Segun Ryabkov, e sancionnan aki ta un continuacion di e trend cu a cuminsa bou di e gobernacion di Obama, cu ta dirigi na daña e relacionnan entre e dos paisnan.
E Minister interino a bisa anteriormente cu e lo topa cu Shannon dia 23 di Juni na St. Petersburg. Riba agenda tabata para “problemanan bilateral” entre e dos paisnan.
E ministerio di Relacionnan Exterior Mericano ta lamenta cu e Rusonan a cancela e afspraak pero a enfatiza cu ta habri pa dialogo.
Presidente di Ukraina, Petro Porosjenko diamars tabata di bishita cerca su colega Donadl Trump. White House despues a anuncia cu e sancionnan lo keda na vigor te ora cu Rusia stop su actividadnan den Oost- Ukraina.
Fuente: www.anp.nl