Loke San Nicolas Business Association a presenta ta pa duna contenido na innovacion, nan lo kier pa IPA na San Nicolas bira un universidad di Aruba. Sr. Mario Croes, di San Nicolas Business Association ta splica.
E universidad lo mester bira uno cu ta bay compaña pa un centro di conocemento y esaki lo bira e catalista cu lo bay zorg pa e forma e fundeshi pa un innovacion cu por bay tuma luga na Aruba. E di dos aspecto ta, e cultura y e activador ta e tereno tras di e muraya. Tin un tereno tras di e muraya cu ta core for di tras di e bushalte te cu Zeewijk, banda di Brandweer. TIn hopi interes pa e tereno aki, cu ta di gobierno y no di refineria. Tin hopi interes importante, pero nan kier pa e tereno wordo traspasa pa e comunidad di San Nicolas.
Con lihe esaki por tuma luga?
Loke por tuma luga lihe ta cu gobierno por instala e San Nicolas Downtown Authority. Haci esaki lo mas lihe posibel, ya e ora e tereno lo wordo traspasa bou di e maneho di e autoridad aki. E di dos parti ta, cu tin un discusion si Aruba por cubri e financiamento di otro universidad, pa cual Sr. Croes a bisa cu e manera cu nan ta visualisa e universidad di San Nicolas, ta cu e manera di duna les tradicional, ta via youtube, via internet, cu no necesariamente bo mester ta den un edificio cu profesornan cu ta biba na Aruba. Tin diferente manera pa corta gasto y toch bin cu’n universidad moderno. E ta realisabel, pero e prome paso ta, kico mester bin na prome luga.
San Nicolas Business Association ta un entidad comercial,y riba esaki Sr. Croes a splica cu e dilema cu nan como entidad empresarial tin cu pa hopi ña caba, cu nan no ta un asociacion di negoshi so, pero nan ta un asociacion pa e comunidad di san nicolas pasobra cu no tin otro caminda pa bati na porta. Nan ta haya cu nan ta e mediador entre varios departamento di gobierno. Nan ta pensando, pa esey bin cu’n City Manager cu ta encarga cu esey.
Kico e ta bay trece di San Nicolas
E tereno tras di e muraya, unda San Nicolas lo haya su lama bek, esey lo bira e waf unda e ferry lo mara. E ferry lo por trece 800 hende, cu p.e. ta di islanan ariba, trece Aruba. No necesariamente e lo por competi cu e compania di aviacion. tin hopi hende cu kier bin Aruba, pero no tin manera di bin cu nan auto. Si e wordo maneha y diseña full e area aki bon, esaki ta bay trece un boost tremendo pa San Nicolas.
Cuanto Tempo?
Un di e otro puntonan ta pa forma un grupo di experto serio cu no ta den politica . Loke nan kier ta pa elabora e plannan aki den torno cu bolts. E plan ta uno den liñanan grandi y gobierno a bisa di ta simpatisa cu e pensamento. E bashamento di e muraya ta algo cu SNBA ta hopi optimista cun’e. E siguiente cu nan kier convence gobierno ta cu San Nicolas merece un universidad. E no ta algo necesariamente lo competi cu esun di Playa, pero nan ta complementa otro. E lo bira un holding, mescos cu Utilities, unda cu ambos universidad ta cay bou di dje. Esaki lo zorg pa nan no surpasa otro, pero complementa otro.
Mas negoshi pa San Nicolas
E plan aki lo por trece mas negoshi pa San Nicolas, pero e lo crea algo nobo pa Aruba. Tin biaha hende ta cortico den pensamento y ta kere cu unico manera di expande ta pa traha hotel. Esaki no ta e unico potencial cu Aruba tin como pais. No ta papia di mas hotel, pero di e creatividad, di pensa ariba e potencial cu nan tin como pais. Y loke nan ta haci cu e mapa aki ta papia di innovacion y cultura, y e por trece hotel. Pero no un hotel internacional, unda cu e placa ta bay afo.
Na 1988, ora a haya e bonanza di tur e hotelnan, e pueblo di Aruba no tabata prepara pe. Tur e restaurant, y tiendanan a haci uzo di nan, ya cu e Arubiano no a wordo prepara pa loke a bin y kico ta e oportunidad cu esaki a trece pe. Y awo si nos ta prepara pa esaki. Y si e plan aki wordo acepta, e universidad lo bay prepara e comunidad, no San Nicolas so, pero e comunidad di Aruba, si esaki ta e posibilidadnan cu e ta trece cun’e, e cursonan cu lo wordo duna y esaki ta e futuro di Aruba, segun Sr. Mario Croes, di San Nicolas Business Association.