“Aruba Ban Celebra”, esey ta e invitacion cu tanto Minister Ing. Mike de Meza di Asuntonan Economico, Comunicacion, Energia y Medio Ambiente, hunto cu e compania nobo Refineria di Aruba, a lansa na henter comunidad. Mientrastanto den fin di siman por a nota cu a cuminsa traha e escenario riba cual e celebracion lo tuma luga cu bandanan local y internacional.
Tanto Gobierno, siendo doño di RDA, como tambe RDA cu awor ta maneha e refineria y e compania FMSA (Fuels Marketing & Supply Aruba), ta masha orguyoso di e logro historico aki, despues di 4 aña cu e refineria no tabata mas den operacion regular. Tambe tin motibo pa celebra, pasobra ta despues di 92 aña cu Aruba porfin ta haya e refineria den nos man. Aruba a bira doño di e facilidadnan y ta huur cu Citgo Aruba, cu desde 1 di October ta encarga pa renoba e facilidadnan pa por cuminsa opera como un “upgrader”, den proceso pa produci un producto cu refinerianan ta uza pa produci un producto final manera kerosin, diesel, gasolin y otronan.
E compania High Performance ta encarga cu luz y sonido durante e evento cu ta cuminsa diasabra awor desde 4:00pm caba. Pa esey e productornan di e compania ya a cuminsa construi e escenario, ta preparando henter e facilidadnan na Carnival Village, unda e concierto gratis aki lo tuma luga. Lo conta cu presentacion di Mike Super Disco, OBS Brassband, PopCorn Dancers, Tsunami, Janiro Eisden, Vince Irie di Hulanda, OREO, Le Groove, sigui pa un show di vuurwerk y pa cera e anochi cu presentacion di “The Queen of Bacchanal”, esta Destra!
Ta corda tur hende cu lo rifa bonnan di gasolin cada ora despues di 7:00pm, entre tur esunnan cu registra pa participa entre 4:00pm y 7:00pm.
E productonan di e evento ta garantisa cu ta preparando un espectaculo di luz y sonido di tal forma cu esaki lo bira e concierto di aña, pa celebra e logro di aña tambe, esta e reapertura di nos refineria. Ta pidi publico pa yega trempan, pasobra ta spera algun mil hende pa hunto nos celebra inicio di un era nobo pa henter nos pais, pero particularmente pa San Nicolas y pariba di brug.