Presidente di San Nicolas Business Association, Sr. Andres Hernandez ta splica cu inoficialmente, tin hopi palabracion haci cu CITGO. Pero oficialmente ainda ta wardando un reunion ainda, cu Refineria di Aruba, y pa sinta cu CITGO. Esaki pa asina tin un palabracion mas claro. Pasobra un cos ta loke ta tende afo, otro cos ta kico ta e situacion pa loke ta bay sosode, pa nan por duna informacion tambe.
Sr. Hernandez a splica cu nan tin nan agenda pa bay reunion cu nan, cual no ta nada nobo, ya cu mester yega bek na unda e tera tabata ta, level e up, segun Sr. Hernandez. San Nicolas Business Association kier tin nan parti cu nan kier mehora, pero si e portanan wordo habri y fluho di hende ta drenta, sali y ta tuma su tempo. Valero ta tuma casi 2 aña.
Ningun comerciante, y vooral un persona cu tin 200 mil florin pa cuminsa un negoshi y e realidad di San Nicolas mester di e fluho, sino nada no ta bay pasa.
Pa loke ta e actividadnan turistico, tin hopi actividadnan ta tumando luga na San Nicolas y Sr. Hernandez, di San Nicolas Business Association, ta duna un danki nan tur esunnan envolvi. Manera semper el a bisa, nan ta dispuesto pa yuda tur esunnan envolvi, unda cu tin mester. Pero, segun Sr. Hernandez, mester tin un organisacion mas fuerte y un intencion di gobierno mas fuerte y mas pisa pa por provoca un lantamento positivo di hendenan cu ta biniendo San Nicolas.