Samantha y Futi perdi den un aventura

Biblioteca Nacional Aruba (BNA) ta casi cla cu e organisacion di su Festival di Buki pa Mucha. Esaki ta un proyecto grandi pa promocion di buki na Aruba. Un proyecto esencial como cu lesamento ta asina importante den desaroyo di un mucha. BNA ta invita un grupo grandi di autor di buki pa mucha y ilustrador pa ban scol, bishita e muchanan y conta storia y duna presentacion. Biblioteca tin invitado di diferente isla y pais y tambe di nos isla mes. Nan ta sr. Richard Dabian, sr. Sergio Tjie A Loi, sra. Olga Buckley, sra. Shaila Vrolijk-Balgobind y sra. Emerita Emerencia. E festival ta tuma lugar di dia 4 di november pa dia 8 di november y su apertura ta diabierna dia 1 di november na Cas di Cultura.

Sra. Emerita Emerencia ta preparando pa conta e muchanan un storia cu titulo: ‘Samantha y Futi perdi den un aventura’. El a skirbi esaki specialmente pa e Festival di Buki pa Mucha 2019. Sra Emerita lo bishita diferente scol den siman di 4 pa 8 di november pa conta su storia.

Na aña 1975, sra. Emerita a bay biba na Canada y eynan el a bay studia y traha den e mundo di teatro. Despues e la sigui cu su training den teatro na York University na Toronto y a gana dos beca pa bay sigui studia teatro y baile na New York, el a bolbe Toronto y a haya e papel di caracter principal di ‘Hermia’, den Shakespeare su obra Midsummer Night’s Dream. E produccion aki a gana e premio mas prestigioso di teatro na Toronto, “The Dora Mavor Moore Award” na 1984.

Como autor, Emerita a presenta 10 “One-woman shows” na Toronto. E shownan aki a hiba Emerita di gira rond di otro parti di Canada. Tambe Kenya, Hulanda, Aruba, Boneiro y Corsou. 10 aña pasa Emerita a regresa bek na Aruba y despues di algun tempo, na 2011, e la bay Surinam di gira durante e Festival di Buki, cu e obra ‘Shon Trupial ta Malo’ cu Fundacion Muchila Creativo.

Na November 2013 Emerita a ricibi e  ‘Premio Nacional di Teatro’ na Aruba, pa entre otro, su contribucion como actriz den obra ‘Vagina Monlogues’, cu un elenco Canades, durante un Festival di Teatro na Aruba, bou direccion di directora Rhoma Spencer di Toronto.

Emerita ta den hunta y ta docente di teatro na Fundacion Muchila Creativo. Na Februari e lo bay di gira na Ontario atrobe  como cuentista cu su obra mas recien, ‘The mouse, the ant and the antelopes’.

Olga su forma di biaha preferi ta fantasia di un storia

For di chikito caba Olga J. Buckley, naci 23 di maart 1950, tabata gusta lesa. Asina cu el a siña con pa haci esaki bo por a top’e cu algo pa lesa. Por tabata buki, corant, pamfleta, basicamente tur cos cu palabra riba dje tabata hala su atencion.

Tin biaha e storianan tabata captiv’e asina hopi cu e tabata hiba su buki scol pa e por a sigui den e mundo di aventura cu tabata revela su mes na dje. Juffrouw y surnan di antes tabata mas streng y no tabata gusta cu e amor pa lesamento aki tabata kita poco di su atencion pa loke ta pasa den klas.

Te cu un dia, el a haya un juffrouw cu tambe tabatin e amor pa lesamento profundo aki, y e juffrouw a cera un pacto cu ne. Si Olga percura pa paga tino na les den klas y haci su tareanan manera mester ta, e lo dun’e espacio pa lesa su bukinan y tambe haci recomendacion di buki cu e mes a gusta hopi. Esaki a inspira Olga pa kier traspasa e amor pa lesamento aki na otronan tambe.

Olga mes a bira juffrouw di scol, y durante mas di 45 aña a para dilanti klas cu hopi amor pa nos muchanan. Mirando cu e tabata tin sintimento special pa mucha den Enseñansa Special, el a dedica mayoria di su carera professional na e tipo di enseñansa aki. Na comienso di su carera tur material na e scolnan special tabata na Hulandes y e muchanan no tur ora tabata compronde e contenido di e lesnan. Olga a cuminsa conta nan storia cortico, cu e temanan cu e tabata trata den su lesnan. For di aki e autor Olga a nace.

‘Bencho ta dual’ (2006) tu prome publicacion di buki pa mucha. E prome den un serie cu ta conta bida di un mucha homber rubiano cu ta pasa den hopi aventura, pero cu no tur ora tin un bon final. Den e serie di Bencho a sigui despues ‘Bencho ta gana un bais’ (2008) y ‘Bencho ta rebeldia’ (2014) E di 4 den e serie ta na caminda y ta priminti di revela hopi mas tocante e hoben Bencho.
Tambe Olga a publica dos tomo di poesia, ‘Curashi’ (2002) y ‘Sin Wak Patras’ (2008).
Mirando e importancia di gusta lesa pa cu nos muchanan, na 2008 Olga a lanta un fundacion, ‘Bon Nochi Drumi Dushi’, cu ta haci hopi actividad diferente pa asina comparti e placer di lesamento ampliamente cu nos muchanan na Aruba. Tambe Olga ta wordo invita pa participa na festival literario y tambe pa duna tayer na Aruba y den exterior na esnan cu tambe kier yuda comparti e placer di lesamento cu nos mucha. Den su tempo liber e gusta traha cu mata, pasa tempo cu su famia y bishita actividad literario y cultural. E tin 3 yiu muhe y dos nieto cu a hereda su pasion di lesamento. Olga su forma di biaha preferi ta fantasia di un storia. Si bo kier sa mas di Olga bo por bishita su website na www.olgajbuckley.com

“Keda humilde, traha duro y sea carinoso”

Shaila, a nace na Surinam y a lanta den un districto na Paranam den un cas di dos piso traha di palo cu dak di ziem. Un mucha muher chikito cu ta gusta ora awa yobe y ta zona riba dak di ziem. den su tempo liber e tawata gusta ta den hardin mey mey di e naturalesa berde bunita. Shaila tawata mag di bay pisca cu su tata y hunga riba e scooter bieu di su tata (cu no tawata core mas ) y ora mama ta cose paña Shaila tambe tawata traha paña pa su popchi y ora su mama caba di  cushina roti riba candela di palo, e tambe tawata lora roti chikito y pone riba e casuela despues di mama.

Di chikito Shaila ta gusta lesa. Shaila su storianan favorito tawata storianan di bijbel di mucha y ‘Suske en Wiske’.  Shaila tawata bay un scol Cristian. Despues di scol basico Shaila a bin biba na Aruba desde 1990 hunto cu su mayornan : Harold y Ansje y rumannan; Ricardo, Rinaldo, Maureen y Raita.

Shaila a caba EPI Welzijnswerk. Y despues a bay IPA pa 2 aña. Desde 2002 Shaila ta trahando cu Traimerdia cu diferente grupo y ultimo 9 aña cu gr 7/8. Ultimo el a haci opleiding Toegepaste Psychologie HBO na Opleiding  Instituut Bonaire. Shaila a siña hopi dor di asisti diferente cursonan di trabou y participa na conferencianan nacional y internacional. como hoben Shaila a duna les na Zondagschool. Pa haya zakgeld e tawata mag di haci vakantie job na Te Aworo Speel School y traha den e proyecto di Serlimar pa hoben den vakantie, pa tene Aruba Limpi.

Shaila ta stima su trabou, pasobra trahando cu muchanan bo ta aporta na e desaroyo di e hende, muchanan ta duna bo inspiracion, animo, ta stimula creatividad den bo y sigur nan ta tene bo jong. Cada mucha ta un regalo di Dios.

Shaila a desaroya su talento di skirbi despues di a experencia diferente presentacionan di autora Desiree Correa  cu su storianan di Companansi y Drumi Dushi. Shaila su hobby ta lesa, baila , scucha musica y cana den naturalesa. Despues di a haci un tour chikito Shaila a descubri su transporte favorito cu ta un helicopter.

Pa ‘Club Di Lesa Dushi Kids’, Shaila a skirbi dos buki : ‘Un regalo pa Abigail’ y ‘Un Team Campeon’. E serie ta encuresha muchanan pa gosa di e storianan y pa descubri un habilidad nobo.

Shaila ta casa cu meneer Vrolijk y nan tin dos yui, Shalinie (2006) y Ashwin (2010) y ta Shaila ta tante di: Lisa, Nathan, Aysha y Ishana. Shaila su lema ta : “Keda Humilde, Traha Duro Y Sea Carinoso.”

Comments

comments