Diabierna mainta 10 di mei Gobernador di Aruba Alfonso Boekhoudt a ricibi e saludo ceremonial di Zr. Ms. Groningen. Despues cu e barco di marina a mara na un manera sigur den waf di Aruba, Comandante di Zr. Ms. Groningen KLTZ Hugo Sinke a haci un bishita oficial na Gobernador.
Saludo
E saludo ceremonial a tuma luga na Paardenbaai dilanti di e Cas Ceremonial di Gobernador. Ora un barco di Marina Real haci un bishita oficial pa di prome biaha na Aruba, tradicionalmente e ta bay acompaña cu un saludo ceremonial.
E saludo a consisti di dos parti. Pa 8.30 a duna e prome saludo na e bandera di Reino cu 21 tiro di cayon. Militarnan di Mariniers Kazerne Savaneta a contesta cu 21 tiro di cayon for di e area na Gouverneursbaai.
Pa 09.00 a haci e di dos saludo na e bandera di distincion di Gobernador. E saludo tambe a consisti di 21 tiro di cayon y a contesta esaki na tera cu e saludo di honor militar. Gobernador a observa e prome saludo for di balcon di e Cas Ceremonial. Pa e di dos saludo, segun tradicion, Gobernador tabata personalmente presente na e sitio.
Barco di stacion Zr. Ms. Groningen
Zr. Ms. Groningen ta un barco di patruya (oceangoing patrol vessel – OPV) cu lo duna servicio di patruya pa dos aña den region di Caribe. Ta uza e barco di stacion pa intercepta transporte di droga y pa duna apoyo na Guarda Costa. Ademas e barco y su tripulacion por duna asistencia por ehempel den caso di desaster natural. Pa por haci su tareanan, e barco tin abordo 2 boto FRISC cu por pone den accion rapidamente, un helicopter marítimo di bataya NH-90 y un boarding team.